​ឃី​ក​ប៊ុ​ក​ស៊ី​ង​៖ លោក ហេង សុខឃ​ន ប្រធាន​សហព័ន្ធ​កីឡា​ឃី​ក​ប៊ុ​ក​ស៊ី​ង​កម្ពុជាបានបង្ហាញ​ពី​ឱកាស​មាស​ចំនួន ២ នៅក្នុង​ព្រឹត្តិការណ៍ “​ស្ដេច​ប្រដាល់​អង្គរ​” ដែល​នឹង​រៀបចំ​នៅមុខ​ប្រាសាទអង្គរវត្តនា​ថ្ងៃទី​១០ ខែមេសា​ខាងមុខ ទី​១-​គឺ​ឱកាស​រួមចំណែក​ទាក់ទាញ​ភ្ញៀវទេសចរ ពិសេស​ទេសចរ​ចិន និង​ទី​២-​គឺជា​ការ​វាស់​ស្ទង់​សមត្ថភាព​កីឡាករ​ក្រុម​ជម្រើសជាតិ សម្រាប់​ត្រៀម​ចូលរួម​ប្រកួត​កីឡា​ស៊ី​ហ្គេមលើក​ទី​៣១ នៅ​វៀតណាមនា​ខែឧសភា​ខាងមុខ។​

​ការ​អះអាង​បែបនេះក្រោយ​បញ្ចប់​សន្និសីទ​សារព័ត៌មាន ស្ដីពី​ការរៀបចំ​ព្រឹត្តិការណ៍​អន្ដរជាតិ​លក្ខណៈ​មិត្តភាព​កម្ពុជា​-​ចិនកាលពី​ថ្មីៗ។ លោក​ថា នេះ​គឺជា​ឱកាស​ដ៏​ល្អ​សម្រាប់​កីឡាករ​-​កីឡាការិនី​កម្ពុជាក្នុងការ​បញ្ចេញ​សមត្ថភាព បន្ទាប់ពី​ពួកគេបាន​សម្ងំ​ហ្វឹកហាត់​ក្នុង​ជុំរុំ​អស់​រយៈពេល​ជា​យូរ តាមរយៈ​ការប្រកួត​ជាមួយ​កីឡាករ​-​កីឡាការិនី​ជើង​ខ្លាំង​មកពី​ប្រទេស​ចិនដើម្បី​ដឹង​ពី​ចំណុចខ្លាំង និង​ចំណុចខ្សោយ​មុន​ចេញទៅ​ប្រកួត​ស៊ី​ហ្គេម។​ ​សូមបញ្ជាក់ថា ក្នុង​ព្រឹត្តិការណ៍ “​ស្ដេច​ប្រដាល់​អង្គរ ឬ Angkor King Fight” គឺមាន​កីឡាករ​-​កីឡាការិនី​ជើង​ខ្លាំង​កម្ពុជា​-​ចិន ១០​គូ​ត្រូវ​ជួបគ្នា​លើទឹក​ដី​អង្គរ ខេត្តសៀមរាប នឹងមាន​ការផ្សាយ​ផ្ទាល់​លើ​កញ្ចក់​ទូរទស្សន៍ BTV។

​បេក្ខភាព ១០​គូដែល​ត្រៀម​អង្រួន​សង្វៀន​ដ៏​ធំ​នេះរួមមាន​កីឡាករ វ៉ាន់ វឿន ត្រូវ​ជួប​កីឡាករ​ចិន Sei Zi Qin និង​កីឡាករ ឈុត សេរី​វ៉ាន់​ថង ត្រូវ​ជួប​កីឡាករ​ចិន Su Ke Xin លើ​វិញ្ញាសា​គុន​ខ្មែរ​ដូចគ្នា។ រីឯ ៨​គូ​ផ្សេងទៀតត្រូវ​ប្រកួត​លក្ខណៈ​ឃី​ក​ប៊ុ​ក​ស៊ី​ងរួមមាន​កីឡាការិនី នៅ ស្រី​ពៅ ជួប​កីឡាការិនី Li Li Shan, កីឡា​ករ ឡុង ប៊ុន​លឿន ជួប​កីឡាករ Gao Xi Feng, កីឡាករ សុទ្ធ វាសនា ជួប​កីឡាករ Yang Hua, កីឡាករ ឡៅ ចិ​ត្រា ជួប​កីឡាករ Wei Wei Yang, កីឡាករ ឡៅ ចិ​ទ្រា ជួប​កីឡាករ Luo Chao, កីឡាករ ឈឿង ឡា​វី ជួប​កីឡាករ Han Wen Bao, កីឡាករ ព្រំ សំណាង ជួប​កីឡាករ Wang Ao Gang និង​កីឡាករ ផល សោ​ភ័​ណ្ឌ ជួប​ជើង​ខ្លាំង​ចិន Wei Rui ក្នុងនាម​គូ​ឯក​ប្រចាំ​ព្រឹត្តិការណ៍​នេះ៕

​អត្ថបទ៖ លី ឈុន​ឡា