​បាល់ទាត់៖ ​ក្រុម​ហង្ស​ក្រហម Liverpool បាន​ធ្វើ​ដំណើរ​ទៅ​ទឹកដី Lisbon ប្រទេស​ព័រទុយហ្កាល់​មុន​ការប្រកួត​រាត្រី​នេះ​ជើង​ទី១ វគ្គ ៨ក្រុម​ចុងក្រោយ UEFA Champions League​។

​​បន្ទាប់ពី​ឈ្នះ​ពាន Carabao Cup និង​ដេញ​ពីក្រោយ​ក្រុម​កំពូល​តារាង English Premier League, Manchester City ១ពិន្ទុ និង​មាន​កៅអី​វគ្គ​ពាក់កណ្តាល​ផ្តាច់ព្រ័ត្រ FA Cup ទៀត​នោះ Liverpool សង្ឃឹម​ថា​នឹង​ធ្វើដំណើរ​បាន​វែងឆ្ងាយ​ថែមទៀត​នៅ UCL ដើម្បី​បន្ត​ក្តី​ស្រមៃ​ឈ្នះ​ពាន​បួន​ក្នុង​មួយ​រដូវ​កាល​។ ​​ខ្សែ​ការពារ Liverpool, Virgil van Dijk បាន​និយាយថា គេ​ចង់​ធ្វើ​ឱ្យ Liverpool មាន​រដូវ​កាល​មិនអាច​បំភ្លេច​បាន ហើយ​ការ​ចង់​ឈ្នះ​ពាន ៤ ក្នុង​មួយ​រដូវ​កាល មិន​មែនជា​រឿង​គួរឱ្យ​ចង់​សើច​ពេក​ទេ សំខាន់​គឺ​មិនត្រូវ​ធ្វើខ្លួន​ឱ្យមាន​សំពាធរាល់​ការប្រកួត​ដែល​នៅសល់​។

​​ក្រុម​របស់លោក Jurgen Klopp មិនមាន​បញ្ហា​របួស​កីឡាករ​មួយរូប​ណា​ឡើយ បន្ទាប់ពី​ខ្សែបម្រើ Naby Keita ទើប​វិល​មក​ហ្វឹកហាត់​វិញរួមជាមួយ​ខ្សែការពារ Trent Alexander-Arnold ផងដែរ​។ ​​ចំណែក Benfica មកដល់ពេលនេះក៏មាន​ទម្រង់​លេង​អស្ចារ្យ​ដែរ បន្ទាប់ពី​ឈ្នះ ៩ប្រកួត​ជាប់​គ្នា​គ្រប​ក្របខណ្ឌ មុន​ចាញ់ Braga ចុងក្រោយ​កាលពី​ថ្ងៃ​សៅរ៍ ៣-២ នៅ​លី​គ​កំពូល​ព័រទុយហ្កាល់​។ ​​តែ Liverpool កាន់តែ​អស្ចារ្យ​ទៅទៀត​ដោយ​ឈ្នះ ១៦ ក្នុងចំណោម ១៧ប្រកួត​ចុងក្រោយ​គ្រប់​ក្របខណ្ឌ​៕

​អត្ថបទ​៖​នាង សុភា​វុ​ធ