ភ្នំពេញ៖ ការការពារសន្តិសុខ សណ្ដាប់ធ្នាប់ សុវត្ថិភាពជូនប្រជាពលរដ្ឋមកដើរលេងកម្សាន្តក្នុងពិធីបុណ្យចូលឆ្នាំថ្មីប្រពៃណីជាតិខ្មែរ គឺជាការងារចម្បងរបស់រដ្ឋបាលរាជធានីភ្នំពេញអនុវត្តតាមគោលការណ៍ដឹកនាំដ៏ខ្ពង់ខ្ពស់បំផុតរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ នេះជាការបញ្ជាក់របស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ។
ឯកឧត្តម ឃួង ស្រេង បានមានប្រសាសន៍ថ្លែងប្រាប់ BTV នៅថ្ងៃទី១៥ មេសា នេះថា ឆ្នាំនេះរដ្ឋបាលរាជធានីភ្នំពេញមានកិត្តិយសដែលបានសហភាពសហព័ន្ធយុវជនកម្ពុជាដឹកនាំដែលឯកឧត្តម ឧបនាយករដ្ឋមន្ត្រី ហ៊ុន ម៉ានី បានជ្រើសរើសយកទីតាំងរដ្ឋបាលរាជធានីភ្នំពេញធ្វើនគរសង្ក្រាន្តហើយរដ្ឋបាលរាជធានីភ្នំពេញក៏បានចូលរួមសហការជាមួយសហភាពសហព័ន្ធយុវជនកម្ពុជាក្នុងការរៀបចំទទួលប្រជាពលរដ្ឋសប្បាយភាព និងទទួលទេវតាឆ្នាំថ្មី។ ដោយនៅថ្ងៃទី១ នៃពិធីបុណ្យចូលឆ្នាំថ្មីប្រពៃណីជាតិខ្មែរនៃ ព្រឹត្តិការណ៍នគរសង្ក្រាន្ត គឺមានប្រជាពលរដ្ឋមកចូលរួមមានការកើនឡើងដល់ទៅបីដង គឺកើនឡើងច្រើនជាងបណ្ដាឆ្នាំមុនៗដោយប្រជាពលរដ្ឋមកដើរលេងកម្សាន្តជិត ១លាននាក់។ ហើយចំពោះការតុបតែងគឺមានភាពល្អប្រសើរច្រើននៅជុំវិញវត្តភ្នំ ក៏ដូចជានៅតាមសួនច្បារស្ពាន នាគ គឺមានការតុបតែងរបស់សហភាពសហព័ន្ធយុវជនកម្ពុជា ធ្វើឲ្យប្រជាពលរដ្ឋចូលរួមដើរលេងកម្សាន្តច្រើន។ ហើយមានទីតាំងសប្បាយភាពប្លែកៗ ពីកន្លែងមួយទៅកន្លែងមួយ។ ហេតុនេះហើយបានជាធ្វើឲ្យមានការទាក់ទាញភ្ញៀវជាតិ និងអន្តរជាតិមកដើរលេងកម្សាន្តច្រើន។
ទាក់ទងទៅនឹងការការពារសន្តិសុខសណ្ដាប់ធ្នាប់នៅក្នុងពិធីបុណ្យចូលឆ្នាំប្រពៃណីជាតិខ្មែរនៃព្រឹត្តិការណ៍នគរសង្ក្រាន្ត ឯកឧត្តម ឃួង ស្រេង បានបញ្ជាក់ថា ការការពារសន្តិសុខ សណ្ដាប់ធ្នាប់ សុវត្ថិភាពជូនប្រជាពលរដ្ឋ គឺជាការងារចម្បងរបស់រដ្ឋបាលរាជធានីភ្នំពេញសហការជាមួយអគ្គស្នងការដ្ឋាននគរបាលជាតិ ក៏ដូចជាបញ្ជាការដ្ឋានអាវុធហត្ថលើផ្ទៃប្រទេស ដោយធ្វើកិច្ចការងារជាប្រចាំក្នុងការខិតខំប្រឹងប្រែងការពារសន្តិសុខសុវត្ថិភាពជូនប្រជាពលរដ្ឋដែលបានចូលរួមសប្បាយភាពក្នុងពិធីបុណ្យចូលឆ្នាំថ្មីប្រពៃណីជាតិខ្មែរ តាមគោលការណ៍ដឹកនាំដ៏ខ្ពង់ខ្ពស់បំផុតរបស់សម្ដេចធិបតី ហ៊ុន ម៉ាណែត តនាយករដ្ឋមន្ត្រីនៃព្រះរាជាណាចក្រកម្ពុជា៕ អត្ថបទ៖ វង្ស សុភាព
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
