​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy និយាយ​ថា ​មូលដ្ឋាន​ច្បាប់​កំពុង​ត្រូវ​បាន​ធ្វើ​ឡើង​ ដើម្បី​នាំ​យក​ទាហាន​រុស្ស៊ី​ដែល​ទទួលខុសត្រូវ​មកកាន់តុលាការ ​ជុំវិញ​អំពើ​ឃោរឃៅ​ដែល​ត្រូវបាន​ចោទប្រកាន់​។

​ទីក្រុង​មូ​ស្គូ​កំពុង​ប្រឈមមុខ​នឹង​ភាព​ស្អប់ខ្ពើម​ជា​សកល និង​ការចោទប្រកាន់​ពីបទ​ឧក្រិដ្ឋកម្មសង្គ្រាម បន្ទាប់ពី​កងទ័ព​រុស្ស៊ី​ដកថយ​ចេញពី​ជាយក្រុង​គី​វ ខណៈ​ត្រូវបាន​គេ​មើលឃើញ​នៅលើ​ដងផ្លូវ រាយប៉ាយ​ដោយ​សាកសព​ជន​ស៊ីវិល​។ រូបភាព​ដ៏គួរ​ឲ្យ​សោកសង្រេង​នៃ​សាកសព​ដែលមាន​ស្នាម​គ្រាប់កាំភ្លើង និង​ការធ្វើ​ទារុណកម្ម​ទុកចោលនៅលើ​ដងផ្លូវ ឬ​កប់​យ៉ាង​ប្រញាប់ នាំឱ្យមាន​ការអំពាវនាវ​ការដាក់​ទណ្ឌកម្ម​កាន់តែ​តឹងរ៉ឹង​លើ​វិមាន​ក្រឹមឡាំង ដូចជា​ការ​កាត់​ផ្តាច់កា​រ​នាំចូល​ប្រេងឥន្ធនៈ​ពី​ប្រទេស​រុស្ស៊ី​។​

​ថ្លែង​នៅក្នុង​សារ​ដែល​បាន​ថត​ទុក​លោក Zelenskyy បាន​ចោទប្រកាន់​រុស្ស៊ី​ថា ព្យាយាម​បំភ្លៃ​ការពិត និងបានចាប់ផ្តើម​យុទ្ធនាការ​ក្លែងក្លាយ​ដើម្បី​លាក់បាំង​កំហុស​របស់​ពួកគេ ក្នុងការ​សម្លាប់​ជន​ស៊ីវិលយ៉ាងច្រើន​នៅក្នុង​ទីក្រុង Mariupol​។​ ​ប្រទេស​អាល្លឺម៉ង់ និង​បារាំង​បាន​ប្រតិកម្ម ដែល​បាន​ឈានទៅរក​ការបណ្តេញចេញ​អ្នកការទូត​រុស្ស៊ីច្រើន​នាក់ ដោយ​លើកឡើងថា​ ពួកគេ​ជា​អ្នកស៊ើប​ការណ៍ ហើយ​ប្រធានាធិបតី​អាមេរិក​លោក Joe Biden បាន​និយាយថា មេដឹកនាំ​រុស្ស៊ី​លោក Vladimir Putin នឹង​ត្រូវបាន​កាត់ទោស​ពីបទ​ឧក្រិដ្ឋកម្មសង្គ្រាម៕

អត្ថបទ៖ ប៊ុនថន