នៅក្នុងឱកាសថ្ងៃទី៣ នៃពិធីបុណ្យចូលឆ្នាំថ្មីប្រពៃណីជាតិខ្មែរ អាជីវករបណ្តាស្តង់ជាច្រើន បានបង្កើនសកម្មភាពលក់ដូរយ៉ាងមមាញឹក ដើម្បីឆ្លើយតបទៅនឹងកំណើនភ្ញៀវទេសចរជាតិ និងអន្តរជាតិធ្វើដំណើរកម្សាន្តនៅព្រឹត្តិការណ៍ «នគរសង្រ្កាន្ត» ។

នៅក្នុងឱកាសដែលរាជរដ្ឋាភិបាលកម្ពុជា បានរៀបចំព្រឹត្តិការណ៍មានសារៈសំខាន់ «នគរសង្រ្កាន្ត» ក្នុងនោះបានកត់សម្គាល់ឃើញថា បណ្តាអាជីវករនៅតំបន់ទេសចរណ៍សំខាន់ៗនៅរាជធានីភ្នំពេញ ដូចជា រមណីយដ្ឋានប្រវត្តិសាស្ត្រវត្តភ្នំ សួនច្បារវឌ្ឍនៈ ផ្សារទួលទំពូង និងផ្លូរថ្មើរជើងចតុមុខជាដើម បានកំពុងមមាញឹកជាខ្លាំងក្នុងការលក់ដូរជូនភ្ញៀវដែលដើរលេងកម្សាន្ត ខណៈនាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ថ្ងៃទី១ រាជធានីភ្នំពេញមានទេសចរណ៍ជាតិ និងអន្តរជាតិ ចំនួនជិត ១លាននាក់ និងថ្ងៃទី២ កើនឡើងចំនួនប្រមាណ ១,៥លាននាក់ បានចូលរួមដើរលេងកម្សាន្ត។

ក្រុមអាជីវករ បានឱ្យដឹងនៅល្ងាចថ្ងៃទី១៦ ខែមេសានេះថា ដោយសារតែពិធីបុណ្យចូលឆ្នាំផង ក៏ដូចជាថ្ងៃជិតចុងសប្តាហ៍ផង ជាពិសេសជឿជាក់ទៀតថា តាមរយៈការរៀបចំព្រឹត្តិការណ៍ និងការផ្សព្វផ្សាយព័ត៌មាននានា ភ្ញៀវទេសចរជាតិ និងអន្តរជាតិ នឹងចូលរួមច្រើន ដូចនេះពួកគាត់បានត្រៀមរួចស្រេច និងបង្កើនឥវ៉ាន់មួយចំនួនដើម្បីដាក់បង្ហាញលក់។

ជាមួយគ្នា ក្រុមអាជីករបានអំពាវនាវថែមទៀតដល់ភ្ញៀវទេសចរទាំងអស់ ចូលរួមដើរកម្សាន្តឱ្យបានច្រើនកុះករ ដើម្បីញុំាឱ្យបរិកាសកាន់តែអ៊ូអ៊រសប្បាយរីករាយ។ បន្ថែមពីនេះទៀត ចូលរួមទស្សនាភូមិវប្បធម៌ខ្មែរ ការលេងល្បែងប្រជាប្រិយ៍ និងទស្សនាទស្សនីយភាពជាច្រើនផ្សេងៗទៀត នៅក្នុងព្រឹត្តិការណ៍ «នគរសង្រ្កាន្ត» ។

សូមបញ្ជាក់ថា ព្រឹត្តិការណ៍ «នគរសង្រ្កាន្ត» រៀបចំឡើងនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ នៅតាមទីតាំងសំខាន់ៗ ដូចជា ៖ រមណីយដ្ឋានប្រវត្តិសាស្ត្រវត្តភ្នំ ស្ពាននាគភ្លោះ ផ្លូរថ្មើរជើងចតុមុខ សួនច្បារវឌ្ឍនៈ ផ្សារទួលទំពូង ផ្លូវបាសាក់ ជាដើម ដើម្បីលើកយកនៅកម្មវិធីប្រពៃណីវប្បធម៌ជាតិខ្មែរតាំងពីបុរាណ មកបង្ហាញជូនភ្ញៀវជាតិនិងអន្តរជាតិ បានយល់ដឹងកាន់តែច្បាស់ពីមរតកវប្បធម៌ដ៏ផូរផង់របស់ខ្មែរ។ ព្រឹត្តការណ៍នេះ រៀបចំឡើងក្នុងគោលបំណងដើម្បីការថែរក្សាការពារ វប្បធម៌ ទំនៀមទម្លាប់ ប្រពៃណីរបស់ដូនតា និងការស្គាល់ច្បាស់ពីអត្តសញ្ញាណជាតិ គឺជាផ្នែកមួយនៃខឿនការពារជាតិដ៏រឹងមាំរបស់ប្រជាជន និងការផ្សារភ្ជាប់ជាមួយវីរកងកម្លាំង និងជនភៀសសឹក ដែលបង្ហាញពីការដឹងគុណ និងការយកចិត្តទុកដល់ពួកគាត់ ដែលកំពុងប្រឈមពីការឈ្លានពានជាដើម៕អត្ថបទ៖ ឈិត បូរ៉ាវី