​បាល់ទាត់៖ ​កំពូល​តារា​ឆ្នើម​របស់​ក្លិប​សេះបង្កង់​ Juventus, Cristiano Ronaldo ទំនងជា​នឹង​ផ្ទេរ​ការ​វិល​ត្រឡប់​ទៅកាន់ ​Manchester United ជាង​ផ្ទេរ​ត្រលប់​ទៅ​ Real Madrid នេះ​បើ​យោង​តាម​របាយការណ៍​ចុងក្រោយ​ស្តីពី​អនាគត​របស់​គាត់​។​

​​ពេលនេះ Ronaldo ស្ថិត​ក្នុង​រដូវ​កាល​ទី៣ របស់​ខ្លួន​នៅ ​Juventus ប៉ុន្តែ​មិនបាន​ធ្វើ​ឱ្យ​ដូច​បំណង​ដែល​សង្ឃឹម ខណៈ​ក្លិប​យក្ស​អ៊ីតាលី​មួយ​មិន​ជោគជ័យ​ឡើយ​នៅ Champions League​។ ​កីឡាករ​សញ្ជាតិ​ព័រទុយហ្កាល់​រូប​នេះ​ធ្លាប់​ឈ្នះ ​Champions League ៥​ដង​ក្នុង​អាជីព​របស់​ខ្លួន ​ពោល​គឺ ៤​ដង​ជាមួយ​ Real Madrid និង​មួយទៀត​ជាមួយ Manchester United ​ប៉ុន្តែ​នៅ Juventus ហាក់​នៅ​ឆ្ងាយ​ពី​ការ​ប្រជែង​ជើងឯក​។ ​មាន​សារព័ត៌មាន​មួយចំនួន​នៅ​អឺរ៉ុប​ បាន​រាយការណ៍​ស្រដៀង​គ្នាអំពី​អនាគត​ដ៏​មន្ទិល​របស់ Ronaldo នៅ​ទីក្រុង Turin ហើយ​ពួកគេ​បាន​បញ្ជាក់ថា ​ប្រសិនបើ​គាត់​សំរេចចិត្ត​ចាកចេញ​នោះ​ ការវិលត្រឡប់​ទៅកាន់​ទឹកដី Old Trafford មើល​ទៅជា​ជម្រើស​ច្រើនជាង​ត្រលប់ Santiago Bernabeu​។

​​វា​ពិតជា​គួរឱ្យ​រំភើប​ណាស់ ​ដែល​បានឃើញ​កីឡាករ​វ័យ ៣៦ឆ្នាំ​រូបនេះ​បាន​វិល​ត្រឡប់មក​ប្រទេស​អង់គ្លេស​វិញ ​ដោយ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ​ Manchester United ​ត្រូវការ​ជម្រើស​ប្រយុទ្ធ​បន្ថែមទៀត​ បន្ទាប់ពី​រដូវ​កាល​ដ៏​ខកចិត្ត​មួយ​ដែល​កីឡាករ Marcus Rashford, Anthony Martial និង Mason Greenwood មាន​ទំរង់​លេង​មិន​ទៀងទាត់​។​ ​សូម្បីតែ​នៅ​វ័យ​ពាក់កណ្តាល ៣០ ក៏ដោយ​ Ronaldo នៅតែ​ជា​កីឡាករ​ដែលមាន​ឥទ្ធិពល​ម្នាក់​នៅលើ​លោក​។​ ​សារព័ត៌មាន​ផ្សេងទៀត​នៅ​អេ​ស្ប៉ា​ញក៏បាន​លើកឡើងថា​ ក្លិប​យក្ស​អេ​ស្ប៉ា​ញ Real Madrid ទំនងជា​ផ្តោតលើ​ការចុះហត្ថលេខា​លើ​ខ្សែប្រយុទ្ធ​វ័យក្មេង Kylian Mbappe​ ពី Paris Saint-Germain ជាជាង​យក Ronaldo មកវិញ​៕

​អត្ថបទ​៖​នាង សុភា​វុ​ធ