​ស្នូក​ឃ័រ៖ ​កីឡាករ​ស្នូកឃ័រ​អូស្ត្រាលី Neil Robertson មិន​រាថយ​ឡើយ ក្រោយ​វាយបក​យកឈ្នះ​កីឡាករ​ជើងចាស់ John Higgins ដើម្បី​គ្រង​ជើងឯក Tour Championship ដែល​រៀបចំ​នៅ​ប្រទេស​វែ​ល​។ ​​បន្ទាប់ពី John Higgins យកឈ្នះ​បី​ហ្វ្រ​ម​ដំបូង Robertson ក៏​តាម​ស្មើ​វិញ ៣-៣ហ្វ្រេ​ម​។

​

​​ក្រោយមក​កីឡាករ​ស្កុ​ត​ឡេ​ន John Higgins ក៏បាន​យកឈ្នះ ៦ហ្វ្រេ​ម​ក្នុងចំណោម ៧ហ្វ្រេ​ម​ដើម្បី​នាំមុខ ៩-៤ហ្វ្រេ​ម តែ Neil Robertson បាន​យកឈ្នះ​វិញ ៦ហ្វ្រេ​ម​ផ្ទួន​សរុប​លទ្ធផល ១០-៩ហ្វ្រេ​ម​មិន​គួរ​ឱ្យ​ជឿ​។​ ​​នេះ​ជា​បរាជ័យ​ទី៣ ហើយ​សំរាប់ John Higgins នៅ​វគ្គ​ផ្តាច់ព្រ័ត្រ​ដែល​បាន​ឈាន​ដល់​ក្នុង​រដូវ​កាល​នេះ ពោលគឺ​ត្រូវការ​ឈ្នះ​តែមួយ​ហ្វ្រេ​ម​ទៀត​ដើម្បី​គ្រង​ជើងឯក តែ​ធ្វើ​មិនបាន​សំរេច​។​ ​​នៅ English Open វគ្គ​ផ្តាច់ព្រ័ត្រ​កាលពី​ខែវិច្ឆិកា​ទល់នឹង Neil Robertson និង Northern Ireland Open វគ្គ​ផ្តាច់ព្រ័ត្រ​ទល់នឹង Mark Allen កាលពី​ខែតុលា អតីត​កីឡាករ​ជើងឯក​ពិភពលោក ៤សម័យ​រូបនេះ​បាន​នាំមុខ ៨-៦ហ្វ្រេ​ម តែ​សុទ្ធតែ​ចាញ់​វិញ​នៅ​ទីបញ្ចប់​។

​​ដោយឡែក​កីឡាករ​អង់គ្លេស Ronnie O’Sullivan ដែល​ឡើងមក​ដល់​វគ្គ​ពាក់កណ្តាល​ផ្តាច់ព្រ័ត្រ​នោះបាន​ឡើងឈរ​លេខ ១ ពិភពលោក​វិញ​ក្រោយ​គូប្រជែង Mark Selby មិនបាន​ចូលរួម​ការប្រកួត​នេះ​។ ​​កម្មវិធី​បន្ទាប់​របស់​ស្នូកឃ័រ​គឺ ការប្រកួត​ជើងឯក​ពិភពលោក​ដែល​នឹង​ចាប់ផ្តើម​នៅ​ថ្ងៃទី១៦ ខែមេសា​នេះ​៕

​អត្ថបទ​៖​នាង សុភា​វុ​ធ