(ហ្វីលីពីន)៖ ក្លឹបបាល់ទាត់កម្ពុជា ព្រះខ័នរាជស្វាយរៀងបង្កើតកំណត់ត្រាឡើងវគ្គផ្ដាច់ព្រ័ត្រជើងឯកក្លឹបលំដាប់ទី៣អាស៊ី (AFC Challenge League)ពីរលើកជាប់គ្នា ពេលឈ្នះក្លឹបបាល់ទាត់ហ្វីលីពីន Manila Diggers ៣ទល់០ ជើងទី២ យប់ថ្ងៃទី១៦ ខែមេសា ឆ្នាំ២០២៦នេះ នៅពហុកីឡដ្ឋាន Rezal Memorial រដ្ឋធានីម៉ានីល ប្រទេសហ្វីលីពីន។

លេងបាន១១នាទី ជើងឯកកម្ពុជាព្រះខ័នរាជស្វាយរៀងផ្ដើមនាំមុខមុនដោយការតែតបញ្ចូលទីពីកីឡាករ ខ្សែការពារ សារ៉េត គ្រីយ៉ា។

ក្រោយមកក្លឹបបាល់ទាត់ហ្វីលីពីនវាយសម្រុកយ៉ាងខ្លាំងលើព្រះខ័នរាជស្វាយរៀង តែធ្វើមិនបានសម្រេចគ្រាប់តាមស្មើនោះទេ។

 ផ្ទុយទៅវិញព្រះខ័នរាជបានដាក់សម្ពាធវាយបកទៅវិញ និងមានឱកាសច្រើនលើកច្រើនសារ រហូតដល់នាទីទី៣៩ កីឡាករ Peprah Kwame ទាត់បញ្ចូលទីគ្រាប់នាំមុខទី២ឱ្យព្រះខ័នរាជស្វាយរៀង។

ចប់វគ្គទី១ ព្រះខ័នរាជស្វាយរៀងនាំមុខម្ចាស់ផ្ទះ Manila Diggers ២ទល់០។

ចូលវគ្គទី២ព្រះខ័នរាជស្វាយរៀងបន្តធ្វើបានល្អបន្ថែមទៀត ហើយកីឡាករ Peprah Kwame បន្ថែមគ្រាប់ទីពីររបស់ខ្លួនឱ្យព្រះខ័នរាជស្វាយរៀងនាំមុខ ៣ទល់នឹង០ លើក្រុម Manila Diggers នៅនាទីទី៦៨។ នាទីនៅសេសសល់មិនមានគ្រាប់បាលបន្ថែមទៀតទេ។ ចប់ការប្រកួតព្រះខ័នរាជស្វាយរៀង ឈ្នះ Manila Diggers ៣ទល់នឹង០។ សរុបទាំងពីរជើងព្រះខ័នរាជឈ្នះ ៤ទល់នឹង១ ទាំងពីរជើង និងឡើងវគ្គផ្ដាច់ព្រ័ត្រជាលើកទី២ជាប់គ្នា។

វគ្គផ្ដាច់ព្រ័ត្រ ព្រះខ័នរាជស្វាយរៀង ត្រូវជួបអ្នកឈ្នះក្នុងតំបន់អាស៊ីខាងលិច នៅថ្ងៃទី៩ ខែឧសភា ឆ្នាំ២០២៦ខាងមុខ៕