កំពង់ឆ្នាំង ៖ ឯកឧត្តម ទេសរដ្ឋមន្រ្តី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា នៅថ្ងៃទី៥ ខែមេសា ឆ្នាំ២០២២នេះ បានអញ្ជើញសំណេះសំណាលជាមួយអតីតយុទ្ធជនខេត្តកំពង់ឆ្នាំងចំនួនជាង ៣០០នាក់ ជាប្រភេទក១ និងក២។

នាឱកាសនោះ ឯកឧត្តម ទេសរដ្ឋមន្រ្តី គន់ គីម បានពាំនាំនូវការផ្តាំផ្ញើសួរសុខទុក្ខរបស់សម្តេចតេជោ ហ៊ុន សែន នាយករដ្ឋមន្រ្តី និងជាប្រធានសមាគមអតីតយុទ្ធជនកម្ពុជា ជូនដល់អតីតយុទ្ធជន។ ឯកឧត្តម គន់ គីម មានប្រសាសន៍ថា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តី និងជាប្រធានសមាគមអតីតយុទ្ធជនកម្ពុជា តែងតែបន្តយកចិត្តទុកដាក់ចំពោះអតីតយុទ្ធជនគ្រប់រូបជាប្រចាំ។

ទន្ទឹមគ្នានេះ ឯកឧត្តម គន់ គីម បានណែនាំឲ្យធ្វើបច្ចុប្បន្នភាពអតីតយុទ្ធជនដែលទទួលប័ណ្ណ ប.ស.ស និងប័ណ្ណសមធម៌ ដើម្បីធ្វើសំណើរផ្តល់ទាំងប័ណ្ណ ប.ស.ស និងប័ណ្ណសមធម៌ជូនអតីតយុទ្ធជនដែលសេសសល់មិនទាន់ទទួលបាន។

ក្នុងឱកាសនោះ ឯកឧត្តម គន់ គីម បញ្ជាក់ថា ការយកចិត្តទុកដាក់ចំពោះមុខរបស់សម្តេចតេជោ ហ៊ុន សែន នាយករដ្ឋមន្រ្តី សំខាន់បំផុតជូនអតីតយុទ្ធជននោះគឺ ការបង្កេីនប្រាក់ ឬបៀវត្សន៍ជូនអតីតយុទ្ធជនដែលមានថវិកាទាប ឲ្យទទួលបានថវិការជាងមុន ក្រោយពីរាជរដ្ឋាភិបាលបានផ្អាកការដំឡេីងប្រាក់បៀវត្សន៍រយះពេល២ឆ្នាំកន្លងទៅ ដោយសារវិបត្តិរាតត្បាតជាសកលពីជំងឺកូវីដ១៩។ 

ឯកឧត្តម គន់ គីម បានផ្តាំផ្ញើដល់អតីតយុទ្ធជនទាំងអស់បន្តអនុវិធានការសុខាភិបាល និងការចាក់វ៉ាក់សាំងដូសជំរុញឲ្យបានគ្រប់ៗគ្នា ៕ អត្ថបទ ៖ សេក