ភ្នំពេញ ៖ នៅរសៀលថ្ងៃទី១៧ ខែមេសា ឆ្នាំ២០២៦នេះ លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានចេញមកបញ្ជាក់ថា កម្លាំងសមត្ថកិច្ចជំនាញ កំណត់បានហើយមុខសញ្ញាក្រុមក្មេងៗ ដែលវាយបំផ្លាញរថយន្តបុរសម្នាក់ នៅខណ្ឌដូនពេញ កាលពីព្រលប់ថ្ងៃទី១៦ ខែមេសា ឆ្នាំ២០២៦ ។ 

ក្នុងខ្លឹមសារដែលលោកឧត្តមសេនីយ៍ឯកស្នងការ បានបង្ហោះថា ៖ ចំពោះបាតុភាពព្រលប់ថ្ងៃទី១៦ ០៤ ២៦ ក្រុមក្មេងៗបានគប់ និងវាយបំផ្លាញរថយន្តនោះ សូមចូលខ្លួនដោះស្រាយនៅអធិការដ្ឋានខណ្ឌដូនពេញឱ្យទាន់ពេលវេលា (តែបើជំនាញតាមចាប់ខ្លួនគឺអនុវត្តនីតិវិធីច្បាប់អត់លើកលែងទេព្រោះមុខសញ្ញាខាងជំនាញក្ដាប់បានហើយ) ។ លោកឧត្តមសេនីយ៍ អំពាវនាវ ឲ្យអាណាព្យាបាល បើដឹងថាកូនក្មួយខ្លួនពាក់ព័ន្ធបញ្ជូនមកសារភាពបន្ទាន់ ។ 

គួររំលឹកថា ករណីហិង្សាខាងលើ បានកើតឡើងកាលពីវេលា១៩ និង៣០នាទីយប់ថ្ងៃទី១៦ ខែមេសា ឆ្នាំ២០២៦ នៅលើកំណាត់ផ្លូវលេខ៩០ ស្ថិតក្នុងសង្កាត់ស្រះចក ខណ្ឌដូនពេញ ។ 

ករណីនេះកើតឡើងផ្តើមចេញពីមានម៉ូតូមួយគ្រឿងម៉ាកហុងដាឌ្រ៊ីម បានបើកទៅបុកពីក្រោយរថយន្តមួយគ្រឿងម៉ាក អាវតា០៧ ពណ៌ខ្មៅ ស៊េរីឆ្នាំ២០២៥ បណ្តាលឲ្យខូចខាតតិចតួច ហើយម្ចាស់រថយន្តក៏ចុះទៅពិនិត្យមើល និងសួរនាំ ប៉ុន្តែភាគីខាងម៉ូតូមិនតប មិននិយាយស្តី ធ្វើឲ្យម្ចាស់រថយន្តខឹងសម្បាក៏ស្រែកស្តីឲ្យ និងរុញម៉ូតូផ្តួល ហើយឡើងជិះរថយន្តចេញពីកន្លែងកើតហេតុ ។ ក៏ប៉ុន្តែភ្លាមនោះ ក្រុមក្មេងៗភាគីខាងម៉ូតូ ក៏បាននាំគ្នាជិះដេញតាមពីក្រោយ និងបាននាំគ្នាស្រែកឲ្យមានការឆោរឡោរយល់ច្រលំថា ភាគីរថយន្តបង្កគ្រោះថ្នាក់ហើយព្យាយាមបើករត់គេច ជាហេតុ នាំឲ្យមហាជនខ្លះ ពិសេសក្រុមក្មេងទាំងនោះបានយកដុំថ្ម និងសម្ភារផ្សេងទៀត គប់ទៅលើភគីរថយន្តបណ្តាលឲ្យរងការខូចខាតតែម្តងទៅ ។ 

ក្នុងករណីនេះ ក្រោយកើតរឿងរ៉ាវនៅយប់ថ្ងៃកើតហេតុ បុរសជាម្ចាស់រថយន្ត ក៏បានចូលខ្លួនទៅបំភ្លឺពីដំណើររឿងហេតុនៅចំពោះមុខសមត្ថកិច្ចរួចរាល់ហើយដែរ និងបានដាក់ពាក្យបណ្តឹងស្នើឲ្យសមត្ថកិច្ចតាមស្រាវជ្រាវចាប់ខ្លួនក្រុមជនទំនើងដែលវាយកម្ទេចរថយន្តរបស់គាត់ផងដែរ ដើម្បីអនុវត្តតាមនីតិវិធីច្បាប់ ៕ លីហេង