បណ្ដាក្រសួង ស្ថាប័ន និងមន្រ្ដីរាជការគ្រប់ជាន់ថ្នាក់ ក៏ដូចជាប្រជាពលរដ្ឋទូទាំងប្រទេស ក្រាប​បង្គំ​ថ្វាយ​ព្រះព​រចំពោះព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រកម្ពុជាឆាប់បានជាសះស្បើយពីព្រះរោគព្រមទាំងមានព្រះរាជសុខភាពល្អ បរិបូរ កម្លាំងពលំមាំមួន ដើម្បីយាងនិវត្តន៍ បន្តគង់​ប្រថាប់ក្នុ​ង​ព្រះបរមរាជ​សម្បត្តិ​ជា​ម្លប់​ដ៏​ត្រជាក់​ត្រជំ​របស់មា​តុភូមិកម្ពុជា និងប្រជានុរាស្ត្រខ្មែរ​គ្រប់​រូប​នៅ​ទូទាំង​ព្រះរាជា​ណា​ចក្រ​កម្ពុជា​ជាដរាបត​រៀងទៅ។

បណ្ដាក្រសួង ស្ថាប័ន មន្ត្រីរាជការគ្រប់ជាន់ថ្នាក់ និងកងកម្លាំងប្រដាប់អាវុធគ្រប់ប្រភេទ ព្រម​ទាំង​ប្រជានុរាស្ត្រទូទាំងព្រះរាជាណាចក្រកម្ពុជា, បានសម្តែងនូវក្តីព្រួយបារម្ភ ក្រោយ​ពី​ទទួល​បាន​ព័ត៌មា​នថា ព្រះរោគមហារីកក្រពេញប្រូស្អាត (Prostate Cancer) របស់ព្រះ​ករុណា​ជា​អម្ចាស់​ជីវិត​លើ​ត្បូង ជាទីគោរពសក្ការៈដ៏ខ្ពង់ខ្ពស់បំផុត តម្រូវឱ្យ ព្រះអង្គ ទទួលការព្យាបាល​ដោយ​ការ​វះ​កាត់​តាម​វេជ្ជបញ្ជានៅក្នុង មន្ទីរពេទ្យនារដ្ឋធានីប៉េកាំង នៃសាធារណរដ្ឋប្រជាមានិតចិន និង​បន្ត​គង់​ប្រថាប់​នៅទីនោះមួយរយៈពេល ដើម្បី តាមដាន ត្រួតពិនិត្យ និងព្យាបាលព្រះរោគ ចាប់​ពី​ថ្ងៃ​ទី​១៨ ​ខែមេសា ឆ្នាំ២០២៦ តទៅ។

បណ្ដាក្រសួង ស្ថាប័ន មន្ត្រីរាជការគ្រប់ជាន់ថ្នាក់ និងកងកម្លាំងប្រដាប់អាវុធគ្រប់ប្រភេទ ព្រម​ទាំង​ប្រជា​នុរាស្ត្រទូទាំងព្រះរាជាណាចក្រកម្ពុជាទាំងអស់ សូមឧទ្ទិសបុណ្យ​កុសល​ទាំង​ឡាយ​ដែល​បាន​កសាង​កន្លងមក និងកម្លាំងចិត្ត ថ្វាយព្រះករុណាជាអម្ចាស់ជីវិតលើត្បូង ជាទីគោរព​សក្ការៈ​ដ៏​ខ្ពង់​ខ្ពស់​បំផុតទទួលបានជោគជ័យពីការព្យាបាលដោយវះកាត់នេះ។

បណ្ដា​ក្រសួង ស្ថាប័ន មន្ត្រីរាជការគ្រប់ជាន់ថ្នាក់ និងកងកម្លាំងប្រដាប់អាវុធគ្រប់ប្រភេទ ព្រម​ទាំង​ប្រជា​នុរាស្ត្រទូទាំងព្រះរាជាណាចក្រកម្ពុជា មានជំនឿ ជឿជាក់យ៉ាងមុតមាំថា ក្រោមការ​យក​ចិត្ត​ទុក​ដាក់​ខ្ពស់​បំផុត​ពី​សំណាក់ក្រុមគ្រូពេទ្យឯកទេស និងជំនាញៗ នៃ សាធារណរដ្ឋប្រជា​មានិត​ចិន​, ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់ បំផុត នឹងឆាប់​ជា​សះស្បើយ​ពី​ព្រះរោគ ជាក់ជាមិនខាន។

បណ្ដាក្រសួង ស្ថាប័ន មន្ត្រីរាជការគ្រប់ជាន់ថ្នាក់ និងកងកម្លាំងប្រដាប់អាវុធគ្រប់ប្រភេទ ព្រម​ទាំង​ប្រជានុរាស្ត្រទូទាំងព្រះរាជាណាចក្រកម្ពុជា សូម​លើក​ហត្ថ​ប្រណម្យ​បួង​សួង​ដល់​វត្ថុ​ស័ក្តិ​សិទ្ធិ​ទាំង​ឡាយ​ក្នុងលោកគុណបុណ្យព្រះរតនត្រ័យកែវទាំងបី ទេវតាថែរក្សាព្រះមហាស្វេតច្ឆត្រ ព្រះ​បារមី​នៃ​អតីត​ព្រះមហាក្សត្រ ព្រះមហាក្សត្រយានីខ្មែរគ្រប់ព្រះអង្គ ជាទីគោរពសក្ការៈ សូម​ព្រះរាជ​មេត្តា​អភិបាល​ថែ​រក្សា ព្រះករុណាជា អម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ឆាប់​បាន​ជា​សះ​ស្បើ​យពីព្រះរោគ និង មាន ព្រះរាជសុខភាពល្អបរិបូណ៌ ព្រះពលានុភាពរឹងមាំខ្លាំងក្លា ឡើង​វិញ ​ដើម្បីយាងនិវត្តន៍បន្តគង់ប្រថាប់ក្នុងព្រះបរម រាជសម្បត្តិ ជាម្លប់ដ៏ត្រជាក់ត្រជំថ្កុំថ្កើង របស់​មាតុ​ភូមិ​កម្ពុជា និងប្រជានុរាស្ត្រខ្មែរគ្រប់រូប របស់ព្រះអង្គ ជាអង្វែង តរៀងទៅ៕