​បាល់ទាត់៖ ​Liverpool នឹង​មាន​ពីរ​គ្រាប់​ចំណេញ​ត្រលប់​ទៅ​ទឹកដី​របស់​ខ្លួន​វិញ​នៅ​ជើង​ទី២ វគ្គ ៨ក្រុម​ចុងក្រោយ UEFA Champions League ក្រោយ​យកឈ្នះ​នៅ​ទឹកដី Benfica ៣-១ យប់មិញ​។ ​ក្រុម​របស់លោក Jurgen Klopp គឺជា​ក្រុម​មានប្រៀប​ក្នុង​ការ​ប្រកួត​នេះ​តាមរយៈ​ការគ្រប់គ្រង​បាល់ និង​ឱកាស​ស៊ុត​។

​​ខ្សែការពារ Ibrahima Konate គឺជា​អ្នក​តែ​ត​បញ្ចូល​ទី​នាំមុខ​ឱ្យ Liverpool នៅ​នាទី​ទី១៧ មុនពេល​ដែល Luis Diaz បញ្ជូន​ឱ្យ Sadio Mane ស៊ុត​គ្រាប់​នាំមុខ ២-០ មុន​ចប់​វគ្គ​ទី១​។ ​​ឈានដល់​វគ្គ​ទី២ Benfica ក៏​តប​បាន​មួយ​គ្រាប់​វិញ​នៅ​នាទី​ទី៤៩ ដោយ Darwin Nunez តាមរយៈ​កំហុស​របស់​ខ្សែការពារ Liverpool, Ibrahima Konate​។​ ​​យ៉ាងណាក្តី Luis Diaz គឺជា​អ្នក​ស៊ុត​គ្រាប់​ទី៣ ឱ្យ Liverpool នៅ​នាទី​ទី៨៧ យកឈ្នះ Benfica ៣-១​។​

​​អ្នកចាត់ការ Liverpool លោក Jurgen Klopp និយាយថា ឈ្នះ​នៅក្រៅ​ដី​មកដល់​វគ្គ​នេះគឺជា​រឿង​ល្អ​ណាស់​សំរាប់​ក្រុម ខណៈដែល Benfica ក៏​ជា​ក្រុម​ល្អ​ដែរ​នៅពេល​វាយបក​ម្តងៗ​។​ ​​ចំណែក​គ្រូបង្វឹក Benfica លោក Nelson Verissimo និយាយថា មិន​អស់សង្ឃឹម​ទេ លោក​នៅតែ​គិតថា​លទ្ធផល​នេះ​អាច​ស្រោចស្រង់​បាន និង​អាចធ្វើឱ្យ​មានរឿង​ភ្ញាក់ផ្អើល​បាន​។ ​​Benfica នឹង​ត្រលប់​ទៅកាន់​ទឹកដី Anfield របស់ Liverpool វិញ​សប្តាហ៍​ក្រោយ​៕

​អត្ថបទ​៖​នាង សុភា​វុ​ធ