កងកម្លាំងអ៊ីស្រាអែលនៅក្នុងតំបន់វេសបែង (West Bank) និងទីក្រុងហ្ស៊េរុយសាឡឹមខាងកើត ( East Jerusalem) បានចាប់ឃុំខ្លួនជនជាតិប៉ាឡេស្ទីនចំនួន ២៣.000នាក់ ដែលភាគច្រើនត្រូវបានដោះលែងនៅពេលក្រោយ ចាប់តាំងពីការចាប់ផ្តើមនៃសង្គ្រាមហ្កាហ្សា ក្នុងខែតុលា ឆ្នាំ ២០២៣។

សមាគមអ្នកទោសប៉ាឡេស្ទីន បានរាយការណ៍កាលពីថ្ងៃអាទិត្យថា តួលេខនេះ រួមបញ្ចូលទាំងបុគ្គលដែលត្រូវបានចាប់ខ្លួនពីផ្ទះរបស់ពួកគេ នៅចំណុចត្រួតពិនិត្យយោធា ឬចាប់ជាចំណាប់ខ្មាំង។

កងកម្លាំងអ៊ីស្រាអែល បានឃាត់ខ្លួនស្ត្រីសរុបចំនួន ៧០០នាក់មកពីតំបន់វេសបែង និងហ្កាហ្សា ខណៈដែលចំនួនកុមារដែលត្រូវបានចាប់ឃុំខ្លួនបានឈានដល់ ១.៨០០នាក់ អំឡុងពេលដូចគ្នា។ ក្នុងចំណោមអ្នកជាប់ឃុំមានអ្នកកាសែតចំនួន ២៤០នាក់ ដែលក្នុងនោះ ៤៣នាក់ កំពុងត្រូវឃុំខ្លួននៅឡើយ។ អ្នកកាសែតម្នាក់ឈ្មោះ Marwan Harzallah អាយុ ៥៤ឆ្នាំ មកពីទីក្រុង Nablus បានស្លាប់ នៅក្នុងពន្ធនាគារអ៊ីស្រាអែល កាលពីខែមុន។

ក្រុមនេះ បាននិយាយថា អ្នកទោសប៉ាឡេស្ទីនចំនួន ៩.៥០០នាក់ នៅក្នុងពន្ធនាគារអ៊ីស្រាអែល ប្រឈម នឹងការរំលោភបំពានធ្ងន់ធ្ងរ រួមទាំងការវាយដំ ការបំភិតបំភ័យសាច់ញាតិ និងការបំផ្លិចបំផ្លាញផ្ទះសម្បែងរបស់ពួកគេ។ នេះបើយោងតាមទីភ្នាក់ងារសារព័ត៌មាន Wafa៕