ព្រឹត្តិការណ៍ «នគរសង្រ្កាន្ត» ដែលរាជរដ្ឋាភិបាលរៀបចំក្នុងឱកាសបុណ្យចូលឆ្នាំថ្មីប្រពៃណីជាតិ មិនត្រឹមជាកម្មវិធីកម្សាន្ត និងទាក់ទាញភ្ញៀវទេសចរប៉ុណ្ណោះទេ ប៉ុន្តែបានរួមចំណែកជំរុញសកម្មភាពពាណិជ្ជកម្ម និងចរន្តសេដ្ឋកិច្ចក្នុងមូលដ្ឋាន ខណៈអាជីវករ លើកឡើងថា ការលក់ដូរមានសម្ទុះកើនឡើងគួរឱ្យកត់សម្គាល់ និងបានបង្កើនចំណូលក្នុងអំឡុងព្រឹត្តិការណ៍នេះ។
ព្រឹត្តិការណ៍ «នគរសង្រ្កាន្ត» ត្រូវបានរៀបចំរយៈពេល ៦ថ្ងៃ ចាប់ពីថ្ងៃទី ១៤ ដល់ ថ្ងៃទី ១៩ ខែមេសា ឆ្នាំ២០២៦ កន្លងមក។ ក្រុមអាជីវករ ដែលបានដាក់ស្តង់លក់ទំនិញនៅតាមបណ្តោយផ្លូវថ្មើរជើងចតុមុខ បានលើកឡើងថា ក្នុងអំឡុងពេល «នគរសង្រ្កាន្ត» គឺលក់ដូររបស់ពួកគាត់ដាច់ខ្លាំង ដោយសារមានមនុស្សច្រើនដើរលេងកម្សាន្តច្រើនកុះករក្នុងព្រឹត្តិការណ៍នេះ។
បណ្ដាអាជីវករលើកឡើងថា ព្រឹត្តិការណ៍នេះ មិនត្រឹមតែជាឱកាសផ្សព្វផ្សាយផលិតផលខ្មែរទៅកាន់ភ្ញៀវជាតិ និងអន្តរជាតិប៉ុណ្ណោះទេ ប៉ុន្តែក៏ជាការរួមចំណែកជំរុញសកម្មភាពសង្គម និងសេដ្ឋកិច្ចផងដែរ។ ពួកគេ ពេញចិត្តការរៀបចំព្រឹត្តិការណ៍នេះ និង ថ្លែងអំណរគុណដល់រាជរដ្ឋាភិបាលដែលរៀបចំ «នគរសង្រ្កាន្ត» ឡើងនៅរាជធានីភ្នំពេញ ដែលពួកគេបានចាត់ទុកថានេះជាវេទិកាសេដ្ឋកិច្ចដ៏ធំប្រចាំឆ្នាំ២០២៦នេះ។
ជារួម ក្រុមអាជីវករ មើលឃើញថា ព្រឹត្តិការណ៍ «នគរសង្រ្កាន្ត» មិនត្រឹមជួយជំរុញការលក់ដូរ និងបង្កើនប្រាក់ចំណូលប៉ុណ្ណោះទេ ប៉ុន្តែថែមទាំងរួមចំណែកធ្វើឱ្យសកម្មភាពសេដ្ឋកិច្ចក្នុងមូលដ្ឋានកាន់តែមានភាពរស់រវើក។ ក្រុមអាជីវករ សង្ឃឹមថា នឹងមានព្រឹត្តិការណ៍ដូចនេះនៅឆ្នាំបន្តបន្ទាប់ៗ៕ អត្ថបទ៖ ធូ វិរៈ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
