ក្នុងអំឡុងពេលរយៈពេលពេញ១សប្តាហ៍ អំឡុងបុណ្យចូលឆ្នាំថ្មី ប្រពៃណីខ្មែរ ឆ្នាំ២០២៦ គ្រប់​មូល​ដ្ឋាន​អាជីវកម្មទេសចរណ៍នៅលើកោះរ៉ុងទាំងអស់ គឺមានភាព​មមា​ញឹក​ខ្លាំង​ទទួល​បាន​ភ្ញៀវ​ទេសចរ​ជាតិ​អន្តរជាតិ ចូលទៅទទួលសេវាកម្មពេញៗ ។

មូលដ្ឋានអាជីវកម្មទេសចរណ៍ដែលមានម្ចាស់ជាជនជាតិបរទេស បានថ្លែងប្រាប់BTV នៅថ្ងៃទី២០ ខែ​មេសានេះថា នៅក្នុងអំឡុងពេល និងក្រោយពេលបុណ្យចូលឆ្នាំថ្មី ប្រពៃណីខ្មែរ ដែល​មាន​ពេល​សរុប​ចំនួន​៦​ថ្ងៃមកនេះ គឺមានភ្ញៀវទេសចរជាតិ អន្តរជាតិ ច្រើនកុះករនាំគ្នា អញ្ជើញមក​ដើរ​កម្សាន្ត​កោះ​រ៉ុង ហើយជាការកត់សំគាល់ គឺមានភ្ញៀវទេសចរជាតិ​ជា​ច្រើន​អញ្ជើញ​ចូល​មក​ទទួល​សេវា​កម្ម​បន្ទប់​ស្នាក់នៅតាមឆ្នេរលំដាប់ផ្កាយ ដែលធ្វើគេមានពេញខ្លាំង​ចំពោះ​កំណើន​ភ្ញៀវទេសចរ​ជាតិ​ជួយទ្រទ្រង់អាជីវកម្មទេសចរណ៍ នៅក្នុងអំឡុងរដូវទេសចរណ៍​បៃតង​ឈាន​ចូល​មក​ដល់​។

ទេសចរជាតិអន្តរជាតិថ្លែងថា ការដើរកម្សាន្តទេសចរណ៍មកលើកោះរ៉ុងនេះ គឺមាន​ភាព​អច្ឆរិ​យៈ​ខ្លាំង ​គេបានដើរកម្សាន្តតាមឆ្នេរមានខ្សាច់សស្អាត មានកន្លែងដើរកម្សាន្តច្រើន តម្លៃសេវា​កម្ម​ស្នាក់​នៅ ​ម្ហូបអាហារ ជួលទូកស្ទូចត្រី ជិះម៉ូតូដើរកម្សាន្ត មិនមានការឡើងថ្លៃ ចំពោះភ្ញៀវ​ដែល​បាន​ធ្វើ​ការ​កក់​ទុកមុន។

តាមរបាយការណ៍មន្ទីរទេសចរណ៍ខេត្តព្រះសីហនុ បានឲ្យដឹងថា អំឡុងថ្ងៃបុណ្យចូលឆ្នាំថ្មី ប្រពៃ ណី​ខ្មែរ បីថ្ងៃ ខេត្តព្រះសីហនុ ទទួលបានទេសចរជាតិ អន្តរជាតិ ដើរកម្សា​ន្ត​ប្រមាណ​ជិត​៤១​ម៉ឺន​នាក់​ ក្នុងនោះភ្ញៀវទេសចរអន្តរជាតិ មានប្រមាណជិត១ម៉ឺននាក់។ ដោយឡែក សម្រាប់កោះរ៉ុង កោះ​រ៉ុងសន្លឹមវិញ ក្នុងអំឡុងថ្ងៃបុណ្យចូលឆ្នាំថ្មី ប្រពៃណីជាតិខ្មែរ ចាប់ពីថ្ងៃទី១១ រហូត​ដល់​ថ្ងៃ​ទី​១៦ ​ខែមេសា ឆ្នាំ២០២៦ ទទួលភ្ញៀវទេសចរជាតិអន្តរជាតិ ដើរកម្សាន្តប្រមាណជិត៧០០០នាក់ ដែល​ធ្វើ​ឱ្យមូលដ្ឋានអាជីវកម្មទេសចរណ៍នៅលើកោះរ៉ុង និងកោះរ៉ុងសន្លឹម ប្រមាណ​ជាង​២០០​ទីតាំង រួមមាន៖ អាជីវកម្មសណ្ឋាគារ បឹងហ្គាឡូ ផ្ទះសំណាក់ មានប្រមាណជិត១៤០០បន្ទប់ និង​មាន​មូល​ដ្ឋានអាជីវកម្មភោជនីយដ្ឋាន អាហារដ្ឋានជាដើម មានភាពមមាញឹក ជាមួយ​នឹង​ការ​មាន​ភ្ញៀវ​ចូល​ទទួលសេវាកម្មពេញៗ៕ អត្ថបទ ឈ្មោះ ស៊ុម សុខជា