ឧបនាយករដ្ឋមន្ត្រីមួយរូបរបស់ប្រទេសថៃ បាននិយាយនៅថ្ងៃចន្ទ (ទី២០ ខែមេសា ឆ្នាំ២០២៦) នេះ រដ្ឋាភិបាលថៃ មានគម្រោងចេញច្បាប់ ដើម្បីខ្ចីប្រាក់ចំនួន ៥០០ពាន់លានបាត (១៥,៦ពាន់លានដុល្លារ) ដើម្បីដោះស្រាយបញ្ហាសេដ្ឋកិច្ច។

លោក Pakorn Nilprapunt បានប្រាប់អ្នកសារព័ត៌មានថា ចំណាត់ការនេះ ត្រូវបានអះអាងថា សមហេតុផល ដោយសារសម្ពាធសមតុល្យសាច់ប្រាក់ និងហានិភ័យខាងក្រៅ និងបរិស្ថានដែលកំពុងកើនឡើង។

លោក Pakorn បានបន្តថា ការខ្ចីប្រាក់ជាក់ស្តែង អាចតិចជាង ៥០០ពាន់លានបាត ប៉ុន្តែច្បាប់បំណុលសាធារណៈ តម្រូវឲ្យកម្រិតបំណុលត្រូវបង្កើន ដើម្បីគ្របដណ្តប់លើចំនួនទឹកប្រាក់ពេញលេញដែលបានបញ្ជាក់នៅក្នុងច្បាប់។

លោកឧបនាយករដ្ឋមន្ត្រីរូបនេះ បានបញ្ជាក់ទៀតថា បំណុលសាធារណៈបច្ចុប្បន្ន មានចំនួនប្រហែល ៦៦ភាគរយនៃផលិតផលក្នុងស្រុកសរុប (GDP) ដោយកៀកនឹងកម្រិតបំណុលមានស្រាប់ ៧០ភាគរយ ដែលនឹងត្រូវការពង្រីកបន្ថែម។ លោកបានបន្ថែមថា ក្រសួងហិរញ្ញវត្ថុនឹងបញ្ចប់កម្រិតបំណុលសាធារណៈថ្មី ដោយសារតែទំហំហិរញ្ញវត្ថុមានកំណត់។

ថ្លៃថាមពលសកលឡើងខ្ពស់ កំពុងចាប់ផ្តើមជះឥទ្ធិពលដល់សេដ្ឋកិច្ចរបស់ថៃ ហើយធ្វើឲ្យមានក្ដីបារម្ភកាន់តែខ្លាំងឡើងៗ ដែលថា ទំនិញប្រើប្រាស់ទូទៅក្នុងស្រុក អាចនឹងហក់ឡើងខ្ពស់ជាលំដាប់៕