លទ្ធផលផ្លូវការបង្ហាញថា អតីតប្រធានាធិបតីគាំទ្ររុស្ស៊ីលោក Rumen Radev នឹងសម្រេចបានជ័យជំនះភ្លូកទឹកភ្លូកដីនៅការបោះឆ្នោតប៊ុលហ្គារី ក៏ដូចជាបញ្ចប់រយៈពេលច្រើនឆ្នាំរបស់រដ្ឋាភិបាលចម្រុះទន់ខ្សោយ ហើយនិងធ្វើឲ្យអ្នកបោះឆ្នោតមានអារម្មណ៍ព្រួយបារម្ភផង លាយឡំនឹងក្តីសង្ឃឹមផង ។

 ការសម្រេចបានលើសពីការស្ទង់មតិនេះ ស្ថិតនៅក្នុងចំណោមលទ្ធផលខ្លាំងបំផុតឈ្នះដោយគណបក្សតែមួយ ក្នុង ១ជំនាន់ ហើយនិងអាចបញ្ចប់អស្ថិរភាពដែលនាំឲ្យមានការបោះឆ្នោត ៨លើក ក្នុងរយៈពេល ៥ឆ្នាំ ។

 នៅតាមដងផ្លូវក្នុងទីក្រុង Sofia ពលរដ្ឋប៊ុលហ្គារីមួយចំនួន បានបង្ហាញការព្រួយបារម្ភរបស់ពួកគេចំពោះគោលជំហរគាំទ្រទីក្រុងមូស្គូរបស់លោក Radev ខណៈពេលរដ្ឋខ្លះទៀត ស្វាគមន៍ទស្សនីយភាពនៃការផ្លាស់ប្តូររបត់នយោបាយ ។ 

 លោក Tsvetan Hristov គឺជាបុគ្គលិកផ្នែក IT វ័យ ៣៦ឆ្នាំម្នាក់ និយាយថា លោកមានការព្រួយបារម្ភ ពីព្រោះថា បើសិនជាគាត់គាំទ្ររុស្ស៊ីពេញបន្ទុក តាមដែលគាត់អាចធ្វើទៅបាន ច្បាស់ណាស់ថា នឹងមានបញ្ហាខ្លាំង ។

 ទោះបីជាយ៉ាងណាក៏ដោយ ពលរដ្ឋប៊ុលហ្គារីផ្សេងទៀត បានបង្ហាញនូវសុទិដ្ឋិនិយមរបស់ពួកគេ ។ លោក Boyan Simeonov គឺជានិស្សិតច្បាប់វ័យ ២៣ឆ្នាំមួយរូប និយាយថា លោកមានជំនឿលើគាត់ លោកយល់ឃើញថា គាត់នឹងធ្វើ មិនមែនត្រឹមតែនិយាយប៉ុណ្ណោះនោះទេ ៕