ប្រធានាធិបតីចិន លោក ស៊ី ជីនពីង (Xi Jinping) បានអំពាវនាវឲ្យបន្តរក្សាការឆ្លងកាត់ជាធម្មតារបស់នាវា តាមរយៈច្រកសមុទ្រ Hormuz ដោយការលើកឡើងនេះកើតឡើងក្នុងអំឡុងពេលមានការសន្ទនាតាមទូរស័ព្ទ នាថ្ងៃចន្ទ (ទី២០ ខែមេសា ឆ្នាំ២០២៦) នេះ ជាមួយរជ្ជទាយាទ Mohammed bin Salman នៃប្រទេសអារ៉ាប៊ីសាអ៊ូឌីត ខណៈដែលទីក្រុងប៉េកាំងកំពុងបង្កើនកិច្ចប្រឹងប្រែង ដើម្បីជួយបញ្ចប់សង្គ្រាមអ៊ីរ៉ង់។

ប្រទេសចិនមានក្ដីបារម្ភ អំពីអស្ថិរភាពថ្មី នៅជុំវិញផ្លូវទឹកយុទ្ធសាស្ត្រនេះ ខណៈដែលបទឈប់បាញ់ រវាងសហរដ្ឋអាមេរិក និងអ៊ីរ៉ង់ បានស្ថិតនៅក្រោមភាពតានតឹងថ្មី ក្រោយសហរដ្ឋអាមេរិក បានរឹបអូសនាវាដឹកទំនិញអ៊ីរ៉ង់ ១គ្រឿង ហើយទីក្រុងតេអេរ៉ង់បានបង្ហាញសញ្ញាថា ខ្លួននឹងមិនចូលរួមក្នុងកិច្ចចរចាសន្តិភាពថ្មីសម្រាប់ពេលនេះទេ។

ចិនគឺជាអ្នកទិញប្រេងឆៅដ៏សំខាន់របស់អ៊ីរ៉ង់។ អ៊ីរ៉ង់ភាគច្រើនបានបិទច្រកសមុទ្រនេះ ចំពោះនាវាផ្សេងទៀត ក្រៅពីនាវារបស់ខ្លួន ចាប់តាំងពីសហរដ្ឋអាមេរិក និងអ៊ីស្រាអែលបានចាប់ផ្តើមសង្គ្រាម កាលពីខែកុម្ភៈ ខណៈដែលទីក្រុងវ៉ាស៊ីនតោនបានដាក់ចេញនូវវិធានការបិទខ្ទប់នាវាអ៊ីរ៉ង់ ចាប់តាំងពីសប្តាហ៍មុន។

សារព័ត៌មាន Xinhua បានដកស្រង់ប្រសាសន៍របស់លោក ស៊ី ដែលបានលើកឡើងថា ប្រទេសចិនគាំទ្រឲ្យមានបទឈប់បាញ់បន្ទាន់ និងទូលំទូលាយ ហើយទទូចឲ្យដោះស្រាយជម្លោះ នៅតំបន់មជ្ឈិមបូព៌ា តាមរយៈបណ្តាញនយោបាយ និងការទូត។ ហើយលោកបានប្រាប់មេដឹកនាំអារ៉ាប៊ីសាអ៊ូឌីតថា «ច្រកសមុទ្រ Hormuz គួរតែនៅតែបើកចំហ សម្រាប់ការឆ្លងកាត់ធម្មតា ព្រោះវាបម្រើផលប្រយោជន៍រួម ទាំងសម្រាប់ប្រទេសក្នុងតំបន់ និងសហគមន៍អន្តរជាតិ»។

គួរបញ្ជាក់ថា ការសន្ទនាតាមទូរស័ព្ទរបស់លោក Xi ជាមួយរជ្ជទាយាទអារ៉ាប៊ីសាអ៊ូឌីតនេះ បានធ្វើឡើងបន្ទាប់ពីកិច្ចប្រជុំមួយ នៅទីក្រុងប៉េកាំង កាលពីសប្តាហ៍មុន ជាមួយរជ្ជទាយាទ Abu Dhabi ជាពេលដែលលោក ស៊ី បានជំរុញឲ្យប្រកាន់ខ្ជាប់ ចំពោះច្បាប់អន្តរជាតិ៕