អ្នកការទូតជាន់ខ្ពស់គុយបាម្នាក់កាលពីថ្ងៃចន្ទ បានបញ្ជាក់ពីកិច្ចពិភាក្សាថ្មីៗ នៅទីក្រុងឡាហាវ៉ានជាមួយមន្ត្រីអាមេរិក ស្របពេលកោះដែលដឹកនាំដោយកុម្មុយនិស្តនេះ កំពុងប្រឈមនឹងវិបត្តិយ៉ាងធ្ងន់ធ្ងរពី យុទ្ធនាការដាក់សម្ពាធរបស់លោកប្រធានាធិបតី ដូណាល់ ត្រាំ។

លោក Alejandro Garcia ប្រធានកិច្ចការគុយបា-អាមេរិករបស់ក្រសួងការបរទេស បានប្រាប់កាសែត Granma របស់គណបក្សកុម្មុយនិស្តថា៖«ខ្ញុំអាចបញ្ជាក់បានថា កិច្ចប្រជុំរវាងគណៈប្រតិភូមកពីគុយបា និងសហរដ្ឋអាមេរិក ត្រូវបានធ្វើឡើងថ្មីៗនេះ នៅក្នុងទីក្រុងឡាហាវ៉ាន »។

លោក Garcia បាននិយាយថា អ្នកចរចារួមមានឧបការីរដ្ឋមន្ត្រីការបរទេសសហរដ្ឋអាមេរិក និងអនុរដ្ឋមន្ត្រីការបរទេសគុយបា។

នាថ្ងៃសុក្រ សារព័ត៌មានអនឡាញអាមេរិក Axios បានរាយការណ៍ថា មន្ត្រីរដ្ឋបាលលោក ត្រាំ បានរៀបចំ កិច្ចប្រជុំជាច្រើន នៅទីក្រុងឡាហាវ៉ាន នៅថ្ងៃទី ១០ ខែមេសា ជាមួយមន្ត្រីគុយបា រួមទាំងលោក Raul Guillermo Rodriguez Castro ចៅប្រុសរបស់អតីតប្រធានាធិបតី Raul Castro។

ក្រុមអ្នកចរចាអាមេរិក បានដាក់ចេញលក្ខខណ្ឌជាច្រើនសម្រាប់ការចរចាជាមួយគុយបា ដើម្បីបន្ត រួមទាំងការដោះលែងអ្នកទោសនយោបាយលេចធ្លោ។ នេះបើយោងតាមសារព័ត៌មាន Axios ដែលបានដកស្រង់សម្តីមន្ត្រីក្រសួងការបរទេសម្នាក់៕