ភ្នំពេញ៖ ឯកឧត្ដម​ ផន រឹម អ្នកនាំពាក្យក្រសួងសាធារណការនិងដឹកជញ្ជូន បាន​ឱ្យ​ដឹង​នៅ​រសៀល​ថ្ងៃ​ទី២១ ខែមេសា ឆ្នាំ២០២៦នេះថា ស្ពានឆ្លងកាត់ទន្លេបាសាក់ចាក់អង្រែក្រោម-ព្រែក​ប្រា ​សម្រេចការសាងសង់បាន ៦៨%ហើយ គិតត្រឹមថ្ងៃទី២០ ខែមេសា ឆ្នាំ២០២៦ មាន​ន័យ​ថា​គម្រោង​នេះ​សម្រេច​ការងារលឿនជាងផែនការ ៦%។

អ្នកនាំពាក្យបានឱ្យដឹងថា អ្វីដែលគម្រោង សម្រេចបានរួមមាន៖ ១/-ផ្នែកគ្រឹះស្ពាន សម្រេច​បាន​១០០% , ២/-ផ្នែករចនាសម្ព័ន្ធក្រោមស្ពានសម្រេចបាន៨៩%, ៣/-រចនា​សម្ព័ន្ធ​លើ​ស្ពាន​សម្រេច​បាន​២៨% (• ធ្នឹម T ចាក់ ១៨០ ដើម សម្រេចបាន ១៣២ ដើម, • ធ្នឹម T ចាក់នៅកន្លែង ១៨០ដើម សម្រេចបាន ១៥៦ដើម), ៤/-បណ្តាញ ផ្លូវសម្រេចបាន ៤៤.៤%(• តភ្ជាប់ សម្រេចបាន ៥០% • ផ្លូវបង្វែរទិស(Ram) សម្រេចបាន ៤២%)។

បើតាមឯកឧត្ដម ផន រឹម ស្ពានចាក់អង្រែក្រោម-ព្រែកប្រា សម្ពោធបើកការដ្ឋាននៅព្រឹកថ្ងៃទី១៩ ខែ​កុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយក​រដ្ឋ​មន្ត្រី ​និងឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា។ តាមប្រតិទិនដំណើរការស្ថាបនា មិន​មាន​ភាព​យឺតយ៉ាវជាងកម្មវិធីការងារដែលគ្រោងទុកទេ ដោយត្រៀមបញ្ចប់​នៅ​ចុង​ឆ្នាំ​២០២៧​ខាង​មុខ​៕