កំពង់ស្ពឺ៖ ឯកឧត្តមទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការ​សមាគម​អតីត​យុទ្ធជន​កម្ពុជា នៅថ្ងៃទី៦ ខែមេសា ឆ្នាំ២០២២ បានអញ្ជើញសំណេះសំណាល និងសួរ​សុខ​ទុក្ខ​អតីត​យុទ្ធជនខេត្តកំពង់ស្ពឺដែលជាជនពិការ ប្រភេទក១ និងក២ ។

ក្រោយពីបានស្តាប់របាយការណ៍ស្វាគមន៍ របស់ប្រធានសមាគមអតីតយុទ្ធជនខេត្តរួចមក ថ្លែងក្នុងឱកាសនោះ ឯកឧត្តម ទេសរដ្ឋមន្ដ្រី គន់ គីម បានជំរុញឲ្យ​ថ្នាក់​ដឹកនាំ​សមាគម​អតីត​យុទ្ធជន​ខេត្តកំពង់ស្ពឺទាំងអស់ ត្រូវតែបន្តធ្វើនូវអំពើល្អ ហើយខិតខំឲ្យអស់ពីកម្លាំងកាយចិត្ត ដោះស្រាយ​រាល់ទុក្ខលំបាករបស់សមាគមអតីតយុទ្ធជន។

ឯកឧត្តម ទេសរដ្ឋមន្ត្រី គន់ គីម ក៏បានថ្លែងកោតសរសើរ និងវាយតម្លៃខ្ពស់ ចំពោះការខិតខំ​បំពេញ​ភារកិច្ចយ៉ាងសកម្ម និងដោយស្ម័គ្រចិត្តរបស់ថ្នាក់ដឹកនាំ សមាគមគ្រប់ថ្នាក់ ធ្វើឲ្យការងារ​សមាគម​មាន​សន្ទុះវិវឌ្ឍន៍គួរឲ្យកត់សម្គាល់។ ឯកឧត្តម បានណែនាំឲ្យ​ថ្នាក់​ដឹកនាំ​សមាគម​គ្រប់ថ្នាក់ ត្រូវបន្តការចុះសួរសុខទុក្ខ អតីតយុទ្ធជនដើម្បីស្វែងយល់ពីស្ថានភាពជីវភាព សុខភាព និង​មានវិធានការ​ជួយពួកគាត់ពេលមានបញ្ហាឲ្យទាន់ពេលវេលា។

ដោយឡែក ថ្នាក់ដឹកនាំ សមាគមអតីតយុទ្ធជនខេត្ត ត្រូវសហការជាមួយស្ថាប័នជំនាញ ធ្វើជាសេនាធិការ​ឲ្យអភិបាលខេត្ត ធ្វើការគ្រប់គ្រងដីសម្បទានសង្គមកិច្ច ដែលរដ្ឋប្រគល់ឲ្យ​ដើម្បី​បែង​ចែក​ជាឡូត៍ នឹងស្នើសុំសម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធាន​សមាគម​អតីត​យុទ្ធជនកម្ពុជា កសាងផ្ទះជូនបងប្អូនសមាជិកដែលអត់ដីអត់ផ្ទះ។

សម្តេចកិត្តិព្រឹទ្ធបណ្ឌិតផ្តល់ជូនសមាជិកចូលរួមជាអតីតយុទ្ធជន ពិការ ក១ និង ក២. ចំនួន 342នាក់ក្នុងម្នាក់ទទួលបានថវិការ ១០០,០០០រៀល និងប្រធានប៉ុស្ត៍រដ្ឋបាល ចំនួន៨៨នាក់ ក្នុងម្នាក់ទទួលបានថវិការ ៥០,០០០រៀល។

ចុងបញ្ចប់ ឯកឧត្តម ទេសរដ្ឋមន្ដ្រី គន់ គីម បានគូសបញ្ជាក់ជូនអង្គប្រជុំថា អ្វីៗដែលសមាជិក​អតីត​យុទ្ធជន​កម្ពុជា ទទួលបានដូចសព្វថ្ងៃនេះ គឺដោយសារប្រទេសយើង មានសន្តិភាព ហេតុនេះ​ទើប​យើងត្រូវអរគុណសន្តិភាព និងដឹងគុណ សម្តេចតេជោ ហ៊ុន សែន ដែលជាស្ថាបនិកសន្តិភាព៕