បេសកជនចិនមួយរូបកាលពីថ្ងៃចន្ទ២០មេសាសប្ដាហ៍នេះបានព្រមានថា ផ្លូវឆ្ពោះទៅរកសន្តិភាពនៅអ៊ុយក្រែននៅតែមានឧបសគ្គ ហើយបានជំរុញឱ្យគ្រប់ភាគីទាំងអស់នៃជម្លោះផ្តល់អាទិភាពដល់សន្តិភាព ក្នុងឆន្ទៈសម្រេចបាននូវបទឈប់បាញ់ និងបញ្ចប់សង្គ្រាមឱ្យបានឆាប់បំផុត។  

ក្នុងសុន្ទរកថារបស់លោកនៅឯសន្និសីទសារព័ត៌មានក្រុមប្រឹក្សាសន្តិសុខអង្គការសហប្រជាជាតិស្តីពីអ៊ុយក្រែន លោក Sun Lei អនុប្រធានតំណាងអចិន្ត្រៃយ៍របស់ប្រទេសចិនប្រចាំអង្គការសហប្រជាជាតិ បាននិយាយថា វិបត្តិអ៊ុយក្រែននៅតែអូសបន្លាយ និងពិបាកដោះស្រាយ ហើយគន្លងរបស់ជម្លោះជះឥទ្ធិពលលើសន្តិភាព និងស្ថិរភាពនៅអឺរ៉ុប និងពិភពលោកទាំងមូល។

លោកថា បទឈប់បាញ់ឆាប់ៗ និងដំណោះស្រាយនយោបាយចំពោះវិបត្តិនេះ គឺជាបំណងប្រាថ្នារួមរបស់សហគមន៍អន្តរជាតិ។

ដោយកត់សម្គាល់ថា កិច្ចខិតខំប្រឹងប្រែងត្រូវតែធ្វើឡើងដើម្បីជំរុញការចរចាសន្តិភាព លោកថាទ្វារសម្រាប់ការសន្ទនាលើបញ្ហាអ៊ុយក្រែនត្រូវបានបើករួចហើយ។  

លោក Sun បានថ្លែងថា ដរាបណាពួកលោកបន្តការចរចា ពួកលោកនឹងមើលឃើញពន្លឺនៃសន្តិភាពដោយបន្ថែមថា ប្រទេសចិនសង្ឃឹមថា គ្រប់ភាគីពាក់ព័ន្ធទាំងអស់នឹងចូលរួមក្នុងដំណើរការសន្តិភាព៕