ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានអញ្ជើញបើកពឹ្រត្តិការណ៍តាំងព័រណ៍ វប្បធម៌ ទេសចរណ៍ និងកីឡា នៅពហុកីឡដ្ឋានជាតិមរតកតេជោ ជាលើកដំបូងរយៈពេល៣ថ្ងៃ ចាប់ពីថ្ងៃទី៦ ដល់ថ្ងៃទី៨ ខែមេសានេះ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរផង និងផ្សព្វផ្សាយពីវប្បធម៌ប្រពៃណីជាតិ បំផុសពីផលិតផលទេសចរណ៍​ក្នុងស្រុកក្រោមម្លប់នៃសន្តិភាពផង។

បើតាមលោកស្រី បូរ៉ានិច តំណាងក្រុមហ៊ុនសហការរៀបចំកម្មវិធីពិព័រណ៍ បានថ្លែងថា នៅ​ក្នុងការ​តាំងពិព័រណ៍វប្បធម៌ ទេសចរណ៍ និងកីឡានេះ ​គឺមានដាក់តាំងបង្ហាញផលិតផលក្នុងស្រុក និង​ផលិតផលទូទៅ ​ទាក់ទង​វិស័យ​ទេសចរណ៍​ អប់រំ វប្បធម៌ ហិរញ្ញវត្ថុ អចលនទ្រព្យ​គ្រឿងយានយន្ត និង កីឡា នៅតាមស្តង់​ប្រមាណ​ជិតត ៣០០ស្តង់។

លោកស្រី បន្តថា នៅក្នុងព្រឹតិ្តការណ៍នេះដែរ ក៏មានកម្មវិធីប្រលងសម្លៀកបំពាក់វប្បធម៌ខ្មែរ អមដោយបទចម្រៀងប្រពៃណីខ្មែរ កម្មវិធីប្រកួតប្រជែងយកជ័យលាភីតារា Tik Tok Award ឆ្នាំ២០២២ និងប្រមូលថវិកាសប្បុរសធម៌ ​បរិច្ចាគ​ដល់​មន្ទីរពេទ្យ​គន្ធបុប្ផា​ ដែលមានប្រមូលផ្តុំតារា Tik Tok ល្បីៗប្រចាំកម្ពុជា។

ឯកឧត្តមរដ្ឋមន្ត្រី ថោង ខុន ថ្លែងថា ព្រឹត្តិការណ៍ពិព័រណ៌វប្បធម៌ ​ទេសចរណ៍និងកីឡា ជា​លើក​ដំបូងនេះ​ គឺជាឱកាសទាក់ទាញប្រជាពលរដ្ឋ ​ក៏ដូចជាគ្រប់ភ្ញៀវទេសចរ ​មកទស្សនា ​និងស្វែងយល់​អំពី​ពហុកីឡដ្ឋាន​ជាតិ​មរតកតេជោដែលជា​សមិទ្ធផល​ជាតិដ៏ធំធេង ​និងថ្មីស្រឡាងមួយដែលកើត ចេញ​ពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាបច្ចុប្បន្ន ​និងជម្រុញ​ ពហុកីឡដ្ឋាន​ជាតិ​មរតក​តេជោ ដែលជាទីតាំង​សម្រាប់​រៀប​ចំព្រឹត្តិការណ៍​ កីឡាអន្តរជាតិ​ SEA Games ឆ្នាំ២០២៣ ក្លាយ​ជា​គោលដៅ​ទេសចរណ៍ថ្មីមួយដែលមាន​សក្តានុពល​ទាក់ទាញ​សម្រាប់​ភ្ញៀវទេសចរជាតិ ​និងអន្តជាតិ ដែលមកកម្សាន្តនៅក្នុង រាជធានីភ្នំពេញ ។

ក្នុងនោះដែរ ឯកឧត្តម បាន​ស្នើបណ្តាប្រតិបត្តិករទេសចរណ៍ ​បណ្តាគ្រប់ភាគី​ពាក់ព័ន្ធ​នៅក្នុង​ឧស្សាហកម្ម​ទេសចរណ៍​ត្រូវ​ធ្វើការ​សម្រប​ខ្លួនធ្វើអាជីវកម្ម​តាមប្រក្រតីភាពថ្មីចៀសផុតពីកូវីដ១៩ និង​ត្រូវគិតគូរអំពីគំរូអាជីវកម្មប្រភេទថ្មី ដែលសម្របខ្លួនបានទៅ​តាម​ស្ថានភាព​សេដ្ឋកិច្ច-សង្គមជាក់ស្តែង ​ដោយក្នុងនោះត្រូវ៖ (ទី១) ​ការបំលែងខ្លួន​ទៅរកការបម្រើសេវាកម្មទេសចរណ៍ តាមរយៈការប្រើប្រាស់បច្ចេកវិទ្យាជាជំនួយ​ (Digitalization), (ទី២) ត្រូវពង្រឹងគុណភាព អនាម័យ និងសុវត្ថិភាព ​ក្នុងការផ្តល់ ​សេវាកម្ម ​និងផលិតផលទេសចរណ៍ជូនដល់ភ្ញៀវទេសចរ​ និង (ទី៣) ត្រូវ​ពង្រឹង​សមត្ថភាព និងគុណភាព ពិសេសការបង្កើនផលិតភាពជាដើម។

ក្នុងឱកាសនោះដែរ ​ក្រសួងសុខាភិបាល ​តាមរយៈរដ្ឋមន្ត្រីក្រសួងទេសចរណ៍ ក៏បានប្រគល់​ឧបករណ៍​តេស្តរហ័សកូវីដ១៩ ចំនួន៥០០ប្រអប់ ហើយក្រសួងទេសចរណ៍ក៏បានប្រគល់ម៉ាស​ចំនួន១០ម៉ឺន ម៉ាសជូនដល់រដ្ឋបាលរាជធានីភ្នំពេញ៕អត្ថបទ ស៊ុម សុខជា