ភ្នំពេញ៖ ឯកឧត្តម សាស្រ្តាចារ្យ ស៊ា ហួង រដ្ឋលេខាធិការតំណាងឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល អំពាវនាវឲ្យមន្រី្តរាជការទាំងអស់ ពង្រឹងនូវបច្ចេកទេស ផ្លាស់ប្តូរឥរិយាបថពីទម្លាប់មិនល្អ ទៅជាអ្នកផ្តល់សេវាជូនប្រជាជនប្រកបដោយសីលធម៌ថ្លៃថ្នូរ មិនរើសអើងអ្នកជំងឺដែល ស្របនឹងសុភាសិតលើកឡើងថា «គ្រូពេទ្យជាមាតាមានព្រហ្មវិហារធម៌ ដ៏ល្អរបស់អ្នកជំងឺ»។

ឯកឧត្តមសាស្រ្តាចារ្យ ស៊ា ហួង លើកឡើងឱកាសដែលមន្ទីរ​ពេទ្យមិត្ត​ភាព​ខ្មែរ-សូវៀត ប្រារព្ធ​ទិវា​វេជ្ជសាស្រ្ត-សល្យសាស្រ្ត ​លើកទី២៤ និងថែទាំវេជ្ជសាស្រ្តលើកទី១១, រយៈពេល២ថ្ងៃ ពីថ្ងៃទី៧-៨ ខែមេសា ឆ្នាំ២០២២។

ឯកឧត្តម សាស្រ្តាចារ្យ ស៊ា ហួង បន្តទៀតថា ក្នុងរយៈពេលពីរថ្ងៃនេះ លោក លោកស្រី ជាគ្រូពេទ្យ គិលានុបដ្ឋាក-យិកាទាំងអស់នៅទីនេះ ​នឹងបានពិភាក្សាផ្លាស់ប្តូរយោបល់គ្នាក្នុងការពិគ្រោះ ព្យាបាលជំងឺការស្រាវជ្រាវ​ការ​រក​រោគ​វិនិច្ឆ័យ​ ជំងឺ​ឲ្យកាន់តែមានគុណភាព និង​ប្រសិទ្ធភាព​ខ្ពស់​ថែមទៀត​ ដែលជាកាតព្វកិច្ចចាំបាច់របស់យើងទាំងអស់គ្នា ​ជាអ្នកពិនិត្យ ​ព្យាបាល ​និងថែទាំជំងឺ ព្រមទាំង​ពង្រឹងការអនុវត្តក្រមសីលធម៌ ​វិជ្ជាជីវៈរបស់ខ្លួនឲ្យកាន់ តែប្រសើរឡើងក្នុងគោលដៅ​កាត់​បន្ថយ​អត្រាស្លាប់ដោយសម្រាលកូន។

ការរៀបចំ​ទិវា​វេជ្ជសាស្រ្ត​សល្យសាស្រ្ត ​និ​ង​ទិវា​ថែទាំវេជ្ជសាស្រ្ត ​បានពង្រឹងការសង្រ្គោះ ​ការថែទាំ និង​ការព្យាបាល​ប្រកប​ដោយ​បច្ចេកទេស និ​ងគុណធម៌នាំ​មកនូវការកាត់​បន្ថយ​អត្រា​មរណៈភាព​មាតា និងទារក ​ជាពិសេសការសម្រាលកូននៅក្នុងមនី្ទរពេទ្យផ្ទាល់។

ជាមួយគ្នានោះ​លោកសាស្រ្តាចារ្យ ងី ម៉េង ​នាយកមនី្ទរពេទ្យមិត្តភាពខ្មែរ-សូវៀត ​បានឲ្យ​ដឹង​ថា ទិវា​នេះធ្វើឡើង ​ផ្តោតសំខាន់ទៅលើការលើក​កម្ពស់​ការព្យាបាល​ ការ​សង្រ្គោះ​បន្ទាន់​លើស្រី្តសំរាលកូន ការព្យាបាល​អ្នកជំងឺខ្សោយ​តម្រង់នោម​ វឌ្ឍនភាពនៃការធ្វើ​រោគវិនិច្ឆ័យ​ជំងឺ​មហារីក​ប្រព័ន្ធ​រំលាយ​អាហារ ​និងការថែទាំ​អ្នកជំងឺហូរឈាមប្រព័ន្ធរំលាយអាហារ។

លោកសាស្រ្តាចារ្យ ងី ម៉េង​ សូម​ថ្លែង​អំណរ​គុណ​ដ៏​ជ្រាលជ្រៅ​បំផុត​ចំពោះ​ឯកឧត្តម ​សាស្រ្តាចារ្យ និងថ្នាក់ដឹកនាំ​ក្រសួងសុខាភិបាលទាំងអស់ ​ជាពិសេស​សម្តេច​អគ្គ​មហា​សេនា​បតី​តេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ​ដែល​ជា​និច្ចកាល​តែងតែ​យកចិត្ត​ទុក​ដាក់​ផ្តល់​នូវសម្ភារៈ បរិក្ខារ ​និង​ហេដ្ឋា​រចនា​សម្ព័ន្ធ​ដល់មនី្ទរពេទ្យ ​ដើម្បីឲ្យមនី្ទរពេទ្យមានលទ្ធភាព​គ្រប់​គ្រាន់​ក្នុង​ការ​ព្យាបាល​ជូនអ្នកជំងឺឲ្យមានប្រសិទ្ធភាពខ្ពស់៕អត្ថបទ រដ្ឋា