ប្រធានាធិបតីសហរដ្ឋអាមេរិក លោក Donald Trump កាលពីថ្ងៃអង្គារ ២១ មេសា សប្ដាហ៍នេះបាននិយាយថា លោកកំពុងបន្តបទឈប់បាញ់ជាមួយអ៊ីរ៉ង់ដោយគ្មានពេលកំណត់ តាមសំណើរបស់ប៉ាគីស្ថាន ដើម្បីផ្តល់ពេលវេលាបន្ថែមទៀតសម្រាប់ការចរចា ប៉ុន្តែនឹងរក្សាការបិទកំពង់ផែរបស់អ៊ីរ៉ង់ពីសំណាក់កងទ័ពជើងទឹកអាមេរិកដដែល។

លោក Trump បានបង្ហោះនៅលើប្រព័ន្ធផ្សព្វផ្សាយសង្គមថា លោកនឹងបន្ថែមរយៈពេលបទឈប់បាញ់រហូតដល់អ៊ីរ៉ង់មានសំណើររួមមួយ ឈានទៅបញ្ចប់ជម្លោះ។ ទោះជាយ៉ាងណាក៏ដោយ លោក បានដឹកនាំយោធារបស់ពួកលោកឱ្យបន្តការបិទកំពង់ផែរបស់ប្រទេសនេះ។ 

ការបន្តបទឈប់បាញ់របស់ប្រធានាធិបតីអាមេរិករូបនេះ បានកើតឡើងប៉ុន្មានម៉ោងមុនពេលត្រូវគេជឿថានឹងផុតកំណត់នៅថ្ងៃពុធនេះម៉ោងនៅអាមេរិក។

ការប្រកាសនេះគឺជាចំណាត់ការចុងក្រោយបំផុតរបស់លោក Trump ដែលបានដកថយពីការគំរាមកំហែងម្តងហើយម្តងទៀតរបស់លោក ក្នុងការទម្លាក់គ្រាប់បែកលើរោងចក្រថាមពល និងហេដ្ឋារចនាសម្ព័ន្ធស៊ីវិលផ្សេងទៀតនៅក្នុងប្រទេសអ៊ីរ៉ង់។ អគ្គលេខាធិការអង្គការសហប្រជាជាតិ លោក António Guterres និងមេដឹកនាំផ្សេងទៀតបាននិយាយថា ច្បាប់មនុស្សធម៌អន្តរជាតិហាមប្រាមការវាយប្រហារបែបនេះ។ពុំមានការអត្ថាធិប្បាយភ្លាមៗពីអ៊ីរ៉ង់ ឬអ៊ីស្រាអែលទេ។

ការបន្ថែមពេលវេលានេះក៏បានកើតឡើងផងដែរ ខណៈសេតវិមានបាននិយាយថា អនុប្រធានាធិបតី JD Vance នឹងមិនទៅប្រទេសប៉ាគីស្ថានសម្រាប់អ្វីដែលត្រូវបានគេរំពឹងថានឹងជាកិច្ចចរចាសន្តិភាពជុំទីពីរនោះទេ។

មន្ត្រីសេតវិមានមួយរូបបាននិយាយនៅក្នុងសេចក្តីថ្លែងការណ៍មួយថា ដំណើរទៅកាន់ប្រទេសប៉ាគីស្ថាននឹងមិនកើតឡើងនៅថ្ងៃនេះទេ។ ព័ត៌មានថ្មីៗបន្ថែមទៀតអំពីកិច្ចប្រជុំទល់មុខគ្នានឹងត្រូវប្រកាសដោយសេតវិមាន៕