អង្គភាពប្រឆាំងអំពើពុករលួយ នឹងបញ្ជូនខ្លួនអគ្គនាយករងអន្តោប្រវេសន៍ និងស្នង​ការ​រង​នគរបាល​រាជ​ធានីភ្នំពេញ រួមទាំងអ្នកពាក់ព័ន្ធ​ចំនួន​២​នាក់​ផ្សេង​ទៀត​ទៅ​សាលា​ដំបូង​រាជ​ធានី​ភ្នំពេញ ​នៅរសៀលថ្ងៃទី២២ ខែមេសា ឆ្នាំ២០២៦នេះ។ នេះបើតាមការបញ្ជាក់របស់ឯកឧត្តម ឱម យ៉ិនទៀង ប្រធានអង្គភាពប្រឆាំងអំពើពុករលួយថ្លែងប្រាប់ BTV នៅថ្ងៃទី២២ ខែមេសា ឆ្នាំ២០២៦។

ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បាន​មាន​ប្រសាសន៍​ប្រាប់​ BTV នៅព្រឹកថ្ងៃទី២២ ខែមេសា ឆ្នាំ២០២៦ នេះថា ៖ នៅវេលាម៉ោង ៤កន្លះរសៀល​ថ្ងៃ​ទី​២២ ​ខែមេសា ឆ្នាំ២០២៦ នេះ អង្គភាពប្រឆាំងអំពើពុករលួយនឹងបញ្ជួនខ្លួនមនុស្សចំនួន ៤នាក់ ទៅ​សាលាដំបូងរាជធានីភ្នំពេញ ពាក់ព័ន្ធករណីស៊ីសំណូក Online Scams និងសម្អាតប្រាក់។

មន្ត្រីនគរបាលដែលអង្គភាពប្រឆាំងអំពើពុករលួយឃាត់ខ្លួនមានដូចជា ឯកឧត្តម ឧត្តម​សេនីយ៍​ឯក​ អ៊ុក ហៃសីឡា អគ្គនាយករងអន្តោប្រវេសន៍ និងឯកឧត្តម ឧត្តមសេនីយ៍ទោ សរ សំណាង ស្នង​ការ​រងរាជធានីភ្នំពេញ ពាក់ព័ន្ធករណីសង្ស័យស៊ីសំណូកពីក្រុមឆបោកតាមប្រព័ន្ធបច្ចេកវិទ្យា Scams Online និងសម្អាតប្រាក់។ ចំណែកអ្នកេះពាក់ព័ន្ធចំនួន ២រូប ផ្សេងទៀត មិន​ត្រូវ​បាន​អង្គ​ភាព​ប្រឆាំងអំពើពុករលួយបង្ហាញអត្តសញ្ញាណនៅឡើយទេ។

សូមជម្រាបថា ឯកឧត្តម ឧត្តមសេនីយ៍ឯក អ៊ុក ហៃសីឡា អគ្គនាយករងអន្តោប្រវេសន៍ និង​ឯកឧត្តម ឧត្តមសេនីយ៍ទោ សរ សំណាង ស្នងការរងរាជធានីភ្នំពេញ និងអ្នកពាក់​ព័ន្ធ​សរុប​ចំនួន​៤​នាក់ ​ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី១៩ ខែមេសា ឆ្នាំ២០២៦៕ អត្ថបទ៖ វង្ស សុភាព