មន្ទីរពេទ្យគន្ធបុប្ផា បានអំពាវនាវដល់សាធារណជន ចូលរួមបរិច្ចាគឈាម ដើម្បីសង្រ្គោះកុមារ និងស្រ្ដីមានផ្ទៃពោះ ដែលត្រូវការឈាមជំនួយ ក្នុងការព្យាបាលដោយការវះកាត់ផ្សេងៗ ខណៈតម្រូវការឈាមបច្ចុប្បន្ននេះមានការកើនឡើង ។
លោកវេជ្ជបណ្ឌិត តឹក លីវណ្ណារ៉ា អនុប្រធាន មន្ទីរពេទ្យគន្ធបុប្ផា បានប្រាប់BTV នៅថ្ងៃទី២២ ខែមេសា ឆ្នាំ២០២៦នេះថា ក្នុងឆ្នាំ២០២៥ មន្ទីរពេទ្យទាំងនៅភ្នំពេញ និងសៀមរាប ប្រើប្រាស់ឈាមជាង៣ម៉ឺនសាក់។ ហើយក្នុងមួយថ្ងៃ ត្រូវប្រើឈាមពី ៩០ ទៅ ១០០សាក់ ក្នុងការព្យាបាលកុមារ និងស្រ្ដីសម្រាលកូន។ តែចំនួនអ្នកស្ម័គ្រចិត្តបច្ចុប្បន្ននេះថយចុះ លោកវេជ្ជបណ្ឌិត អំពាវនាវដល់សាធារណជន បន្តចូលរួមបរិច្ចាគឈាមឲ្យបានច្រើន។
ចំណែកអ្នកស្ម័គ្រចិត្តបរិច្ចាគឈាម បានប្រាប់ BTVដែរថា ពួកគេតែងតែចូលរួមបរិច្ចាគឈាម គាំទ្រសកម្មភាពមន្ទីរពេទ្យគន្ធបុប្ផា យ៉ាងហោចណាស់ ២ដងក្នុងមួយឆ្នាំ។ តែដោយសារតម្រូវការឈាមកើនឡើងនេះ ពួកគេនឹងចូលរួមបរិច្ចាគឈាមបន្ថែមទៀត។
អាណាព្យាបាល ដែលនាំកូនមកព្យាបាលនៅមន្ទីរពេទ្យគន្ធបុប្ផា បានថ្លែងអំណរគុណក្រុមគ្រូពេទ្យ និងពលរដ្ឋទាំងអស់ ដែលបរិច្ចាគឈាមជូនមន្ទីរពេទ្យ រួមចំណែកជួយសង្រ្គោះកូនរបស់ពួកគាត់។ ពួកគាត់ អំពាវនាវសូមឲ្យចូលរួមបរិច្ចាគឈាមបន្តទៀត។
សូមជម្រាបជូនថា ប្រជាពលរដ្ឋអាចចូលរួមបរិច្ចាគឈាមបាន ចាប់ពីអាយុ១៨ដល់៦០ឆ្នាំ មានទម្ងន់ចាប់ពី៤៥គីឡូឡើងទៅ និងគ្មានជំងឺរ៉ាំរ៉ៃ ដែលត្រូវលេបថ្នាំជាប្រចាំ។ ការបរិច្ចាគឈាម បុរស អាចធ្វើឡើងរយៈពេល ៣ខែម្ដង ចំណែកស្រ្ដី អាចធ្វើឡើងរយៈពេល ៤ខែម្ដង។ ការបរិច្ចាគឈាម ក្រៅពីជួយសង្រ្គោះជីវិត ក៏ជួយផងដែរ ដល់អ្នកបរិច្ចាគ ឲ្យចរន្ដឈាមដើរបានល្អ ជំរុញការផលិតគ្រាប់ឈាមថ្មី និងកាត់បន្ថយហានិភ័យជំងឺបេះដូងផងដែរ៕ អត្ថបទ៖ លៀ ស៊ីណា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
