ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានក្រើនរំលឹក និងដាក់បទបញ្ជាដល់កម្លាំងនគរបាលអន្ដោប្រវេសន៍ ពិសេសនៅតាមព្រំដែនត្រូវតែពង្រឹងគ្រប់គ្រងការចេញ-ចូល របស់ជនបរទេស។

សម្តេច បញ្ជាក់ថា ក្នុងករណីជនបរទេសចូលមកកម្ពុជាដោយគ្មានលិខិតស្នាម ឬស្នាក់នៅដោយ​គ្មាន​ច្បាប់ទម្លាប់​ ត្រូវចាប់ខ្លួនបណ្ដេញចេញភ្លាមៗ​ ដោយមិនខ្វល់ថា​សញ្ជាតិ​ណានោះឡើយ។

ថ្លែង​ក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ ​និងលើកទិសដៅបន្ដរបស់​អគ្គ​នាយកដ្ឋាន​អន្ដោប្រវេសន៍ ​នៅរសៀលថ្ងៃទី៦ ខែមេសា ឆ្នាំ២០២២ ​សម្ដេចក្រឡាហោម ស ខេង បញ្ជាក់ថា កម្ពុជា បានអនុវត្តដោយជោគជ័យលើការងារដកហូតឯកសារ​ខុសច្បាប់​ដែល​កាន់កាប់​ដោយ​មិនប្រក្រតីពីជនបរទេស ​ដូច្នេះការស្នាក់នៅដោយខុសច្បាប់មិនត្រូវឲ្យ​កើតមានឡើងវិញ​នោះទេ ដោយត្រូវមានវិធានការម៉ឺងម៉ាត់ជាប់ជាប្រចាំ ហើយមិនត្រូវទុកឲ្យមានអ្នកដែលលួចចូល​មក​រស់នៅមិនស្របច្បាប់ ​នៅក្នុងប្រទេសកម្ពុជាយើង។

នាយឧត្តមសេនីយ៍ ​គៀត ច័ន្ទថារិទ្ធ ​អគ្គនាយកនៃ​អគ្គ​នាយកដ្ឋាន​អន្ដោ​ប្រវេសន៍ ​បញ្ជាក់ថា ដើម្បី​គ្រប់គ្រង​ក្រសួងមហាផ្ទៃ បានផ្តល់បណ្ណស្នាក់នៅអចិន្ត្រៃយ៍ជូនអ្នកដែលមានអាយុ១៨ឆ្នាំឡើង ចំនួន៦៥,១៦៨នាក់​ ជាមួយនោះ ​បានផ្តល់បណ្ណបន្តសុពលភាពដែលមានរយៈពេល០២ឆ្នាំម្ដង សរុប​ចំនួន១៩,៥៦១បណ្ណ ​ក្នុងនោះបានបន្ត​សុពលភាព​លើកទី១ ចំនួន១៥,៩៣៣នាក់, លើកទី២ ចំនួន ៣,៥៦៧នាក់, លើកទី៣ ចំនួន៥២នាក់ និងលើកទី៤ ចំនួន០៩នាក់៕