ប្រភពសន្តិសុខដែនសមុទ្រ និងប្រតិបត្តិការពាណិជ្ជកម្មសមុទ្រចក្រភពអង់គ្លេស (UKMTO)បាននិយាយថា នាវាដឹកទូកុងតឺន័រយ៉ាងហោចណាស់បីគ្រឿងត្រូវបានរងការបាញ់ប្រហារនៅច្រកសមុទ្រ Hormuz នៅថ្ងៃពុធ នេះ។ 

អ៊ីរ៉ង់បានដាក់ការរឹតត្បិតលើនាវាទាំងឡាយដែលធ្វើចរាចរណ៍នៅក្នុងច្រកសមុទ្រនេះ ដំបូងឡើយជាការសងសឹកចំពោះការបាញ់ផ្លោងរបស់សហរដ្ឋអាមេរិក-អ៊ីស្រាអែលមកលើប្រទេសនេះ ហើយបន្ទាប់មកជាការឆ្លើយតបទៅនឹងការបិទផ្លូវកំពង់ផែអ៊ីរ៉ង់ពីសំណាក់សហរដ្ឋអាមេរិក។  

នាវាដឹកទូកុងតឺន័រដែលមានទង់ជាតិលីបេរីយ៉ាមួយគ្រឿងបានរងការខូចខាតដល់ស្ពានរបស់នាវា បន្ទាប់ពីត្រូវបានរងការបាញ់ប្រហារ និងគ្រាប់បែកដៃ ដែលបាញ់ដោយជើងទម្របាញ់គ្រាប់រ៉ូកែតនៅភាគឦសាននៃប្រទេសអូម៉ង់។

UKMTO បាននិយាយថា ប្រធាននាវាបានរាយការណ៍ពីទូកបំពាក់កាំភ្លើងរបស់ឆ្នាំបដិវត្តន៍អ៊ីរ៉ង់ IRGC ចូលទៅជិត ហើយនាវានោះ ត្រូវបានរងការបាញ់ប្រហារជាបន្តបន្ទាប់។ សមាជិកនាវិកទាំងអស់មានសុវត្ថិភាព ហើយពុំមានអគ្គិភ័យ ឬផលប៉ះពាល់បរិស្ថានដោយសារតែឧបទ្ទវហេតុនេះទេ។

ប្រភពសន្តិសុខសមុទ្របាននិយាយថា មនុស្សបីនាក់នៅលើទូកបំពាក់កាំភ្លើងនោះ។

ប្រធាននាវាដឹកទូកុងតឺន័រ ដែលដំណើរការដោយប្រទេសក្រិក ក៏បានរាយការណ៍ផងដែរថា មិនមានការទាក់ទងតាមវិទ្យុណាមួយត្រូវបានធ្វើឡើងមុនពេលមានឧបទ្ទវហេតុនេះទេ ហើយថា នាវានេះត្រូវបានជូនដំណឹងដំបូងថា ខ្លួនមានការអនុញ្ញាតឱ្យឆ្លងកាត់ច្រកសមុទ្រ Hormuz។

ក្រោយមក UKMTO បាននិយាយថា នាវាដឹកទូកុងតឺន័រទីពីរគ្រឿងទៀតត្រូវបានរងការបាញ់ប្រហារនៅចម្ងាយប្រហែលប្រាំបីម៉ាយល៍នៅភាគខាងលិចនៃប្រទេសអ៊ីរ៉ង់។ នាវាដែលមានទង់ជាតិប៉ាណាម៉ាមិនត្រូវបានខូចខាតទេ ហើយសមាជិកនាវិករបស់នាវានោះក៏មានសុវត្ថិភាពដែរ។

ប្រភពសន្តិសុខដែនសមុទ្របាននិយាយថា នាវាដឹកទូកុងតឺន័រទីបីត្រូវបានរងការបាញ់នៅចម្ងាយប្រហែលប្រាំបីម៉ាយល៍ភាគខាងលិចនៃប្រទេសអ៊ីរ៉ង់ ខណៈកំពុងធ្វើដំណើរចេញពីច្រកសមុទ្រ Hormuz៕