ក្រសួងអប់រំ យុវជន និងកីឡា នឹងប្រឡងជ្រើសរើសសិស្សពូកែថ្នាក់ជាតិ ថ្នាក់ទី ៩ និងថ្នាក់ទី១២ នៅ​ថ្ងៃចន្ទ​ដើម​សប្ដាហ៍ក្រោយនេះ។ ការប្រឡងធ្វើឡើងនៅរាជធានីភ្នំពេញ ដែលសិ​ស្ស​ពូ​កែ​មក​ពី​តាម​បណ្ដា​ខេត្ត ចំនួន២៤០នាក់ ត្រូវមកប្រឡងជុំគ្នាផ្ដាច់ព្រ័ត្រ។

ក្រសួងអប់រំ យុវជន និងកីឡា បានកំណត់រយ:ពេល២ថ្ងៃ សម្រាប់​ការ​ប្រឡង​ជ្រើស​រើស​សិស្ស​ពូកែ​ទូទាំង​ប្រទេសថ្នាក់ជាតិ ថ្នាក់ទី ៩ និងថ្នាក់ទី ១២នៅមណ្ឌលប្រឡង វិទ្យាល័យសន្ធរម៉ុក។ នេះ​ជា​ការប្រឡងសិស្សពូកែលើមុខវិជ្ជាឯកទេស អក្សរសិល្បិ៍ខ្មែរ គណិតវិទ្យា និងរូបវិទ្យា។ លើស​ពី​ការ​ប្រឡងលើមុខវិជ្ជាឯកទេស បេក្ខជននីមួយៗ ក៏ត្រូវប្រឡងលើមុខវិជ្ជា វប្បធម៌ទូទៅ​ជា​ចាំបាច់​។

ចំពោះប្រធានវិញ្ញាសាប្រឡងជ្រើសរើសសិស្សពូកែទូទាំងប្រទេស រៀបចំដោយក្រសួងអប់រំ យុវជន និងកីឡា ដោយគិតតាមកម្មវិធីសិក្សាពីថ្នាក់ទី៧ ដល់ថ្នាក់ទី៩ សម្រាប់​ការ​ប្រឡង​ជ្រើស​រើស​សិស្ស​ពូកែថ្នាក់ទី៩ និងពីថ្នាក់ទី៧ ដល់ថ្នាក់ទី១២ សម្រាប់ការប្រឡង​ជ្រើស​រើស​សិស្ស​ពូកែ​ថ្នា​ក់​ទី១២។

ការប្រឡងនេះ កំណត់ឱ្យ បេក្ខជនសិស្សពូកែទាំងអស់ ត្រូវស្លៀកពាក់ឯកសណ្ឋានសិស្ស ដោយ​ប្រើ​អាវ​ពណ៌ស និងខោ ឬសំពត់ ពណ៌ខៀវ។ អាវត្រូវស៊កចូលក្នុងខោ ឬសំពត់ឱ្យបានត្រឹមត្រូវ ហើយ​ត្រូវពាក់បណ្ណសម្គាល់ខ្លួននៅពេល ចូលមណ្ឌលប្រឡង ចូលរួមពិធីបើក និង​បិទ​ការ​ប្រឡង​ជ្រើសរើសសិស្សពូកែទូទាំងប្រទេស បេក្ខជនសិស្សពូកែម្នាក់ៗ អាចជ្រើសរើសមុខវិជ្ជាឯកទេស ដើម្បី​ធ្វើការប្រឡងបានតែមួយមុខវិជ្ជា ប៉ុណ្ណោះក្នុងចំណោមមុខវិជ្ជា អក្សរសិល្ប៍ខ្មែរ គណិតវិទ្យា និង​រូបវិទ្យា។

ការប្រឡងធ្វើឡើងរយ:ពេល ២ថ្ងៃ គឺថ្ងៃទី ២៧ និងថ្ងៃទី ២៨ ខែ មេសា ខណៈការ​ប្រកាស​លទ្ធផល​ គ្រោងធ្វើឡើងនៅថ្ងៃ ទី ៣០ ខែមេសា ឆ្នាំ២០២៦។

ចំពោះប្រាក់​រង្វាន់តាមចំណាត់ថ្នាក់ បានបែងចែក ដោយចំណាត់ថ្នាក់លេខ១ ទទួលបាន ៣ ៥០០ ០០០ រៀល ចំណាត់ថ្នាក់លេខ២ទទួលបាន ៣ ២០០ ០០០ រៀល ចំណាត់ថ្នាក់លេខ៣ ទទួលបាន ២ ៩០០ ០០០ រៀល ចំណាត់ថ្នាក់លេខ ៤ទទួលបាន ២ ៦០០ ០០០ រៀល និង​ចំណាត់​ថ្នាក់​លេខ៥ ទទួលបាន ២ ៣០០ ០០០ រៀល ៕ អត្ថបទ៖ គឹម ហុក