មូលដ្ឋានអាជីវកម្មទេសចរណ៍មួយចំនួននៅរាជធានីភ្នំពេញ និងខេត្តព្រះសីហនុ ចាប់ពីខែឧសភា រហូត​ដល់​តុលា នឹងសហការ​គ្នា​ចាប់​ផ្តើម​រៀបចំ​ការ​បញ្ចុះ​តម្លៃ​សេវា​កម្ម​របស់​ខ្លួន​ចាប់​ពី​២០​ទៅ​៣០​ភាគរយ​ ទៅលើកញ្ចប់ទេសចរណ៍ សណ្ឋាគារ រមណីយដ្ឋាន រីស៊ត ជាដើម ដើម្បីទាក់​ទាញ​ទេសចរ​ក្នុង​ស្រុកដើរកម្សាន្តនៅក្នុងរដូវកាលទេសចរណ៍បៃតង។

ការីទេសចរណ៍​នៅរាជធានីរាជធានីភ្នំពេញ លោក ម៉េត សុជាតិ បានប្រាប់BTV នៅថ្ងៃទី២៣ ខែមេសានេះថា ជាទូទៅ នៅក្នុងរដូវទេសចរណ៍បៃតងឈានចូលមកដល់ម្តងៗ គ្រប់​ការី​ទេសចរណ៍​នានា តែងតែរៀបចំកញ្ចប់ទេសចរណ៍ក្នុងតម្លៃពិសេស ហើយសម្រាប់គោលដៅ​ទេសចរណ៍​ទៅ​ក្រុងកោះរ៉ុងវិញ គឺភ្ញៀវទេសចរទាំងអស់គ្នា អាចសាកសួរព័ត៌មាននានា នៅ​មជ្ឈ​មណ្ឌល​ផ្តល់​សេវាទេសចរណ៍ (TSA) ដោយមិនមានគិតថ្លៃ ដើម្បីដឹងព័ត៌មាន​អំពី​ការ​បញ្ចុះ​ថ្លៃ​ពិសេស​លើ​សេវាធ្វើដំណើរ និងស្នាក់នៅ។

បណ្តាម្ចាស់រីស៊ត និងសណ្ឋាគារ បឹងហ្កាឡូ នៅលើកោះរ៉ុង ក៏បានឱ្យដឹងដែរថា អនុវត្ត​តាម​គោល​ការណ៍​ណែ​នាំក្រសួងទេសចរណ៍ និងមានកិច្ចសហការជាមួយការីទេសចរណ៍នានា បញ្ចុះតម្លៃ​ពី​២០%​ទៅ​៣០% នៅក្នុងរដូវទេសចរណ៍បៃតង ដើម្បីទាក់ទាញទេសចរក្នុងស្រុកចេញដើរកម្សាន្ត ជួយ​ទ្រ​ទ្រង់អាជីវកម្មទេសចរណ៍ និងបុគ្គលិកបម្រើការ ខណៈនៅក្នុងរយៈពេលនេះ ភ្ញៀវអន្តរជាតិ បានត្រឡប់ទៅធ្វើការងារនៅប្រទេសគេវិញ ជាហេតុធ្វើឱ្យភ្ញៀវទេសចរអន្តរជាតិមានការធ្លាក់ចុះ។

រដ្ឋមន្ត្រីក្រសួងទេសចរណ៍ ឯកឧត្តម ហួត ហាក់ ជារឿយៗនៅក្នុងរដូវទេសចរណ៍បៃតងជិតឈានចូលមកដល់នេះ តែងតែអំពាវនាវដល់មូលដ្ឋានអាជីវកម្មទេសចរណ៍បញ្ចុះតម្លៃសេវាកម្មខ្លួន ដើម្បីទាក់ទាញទេសចរក្នុងស្រុកចេញដើរកម្សាន្ត ដើម្បីឱ្យភ្ញៀវទេសចរជាតិនានាទទួលបានឱកាសសប្បាយរីករាយ យល់ដឹង ស្គាល់ពីសក្តានុពលទេសចរណ៍ ៦គួរ រួមមាន៖ ១. គួរភ្លក្ស សំដៅឱ្យភ្ញៀវទេសចរជាតិស្គាល់ម្ហូបអាហារប្រចាំតំបន់ ២. គួរស្នាក់នៅ ដើម្បីស្គាល់ពីបន្ទប់ស្នាក់នៅស្អាតពីផ្ទះស្នាក់រហូតសណ្ឋាគារលំដាប់ផ្កាយប្រាំ ៣. គួរទស្សនា តំបន់មានសក្តានុពលទេសចរណ៍ ៤. គួរសាកល្បង ទទួលយកបទពិសោធន៍ អនុស្សាវរីយ៍ថ្មីសម្រាប់ជីវិត ៥. គួរចង់ឃើញ កន្លែងកម្សាន្តដែលមានស្រាប់ ឬកន្សែងកម្សាន្តថ្មីៗ និងទី៦. គួរទិញ សម្រាប់ផលិតផលពិសេសប្រចាំតំបន់ គាំទ្រផលិតផលក្នុងស្រុកជាដើម៕ អត្ថបទ ស៊ុម សុខជា