នៅថ្ងៃព្រហស្បតិ៍ (ទី២៣ ខែមេសា ឆ្នាំ២០២៦) នេះ លោក Reza Pahlavi ដែលជារាជបុត្ររបស់ព្រះមហាក្សត្រអ៊ីរ៉ង់ដែលត្រូវបានទម្លាក់ពីរាជបល្ល័ង្ក បានលើកហេតុផលថា ការចរចាណាមួយជាមួយថ្នាក់ដឹកនាំសាសនា នៅទីក្រុងតេអេរ៉ង់ គឺស្មើនឹង «ការព្រមចុះញ៉ម» ហើយបានសម្តែងក្តីសង្ឃឹមថា ការតវ៉ាតាមដងផ្លូវថ្មី នឹងផ្តួលរំលំរបបនេះ។

លោក Pahlavi វ័យ ៦៥ឆ្នាំ កំពុងថ្លែងនៅក្នុងដំណើរទស្សនកិច្ចទៅកាន់ទីក្រុងប៊ែរឡាំង ជាទីដែលលោកត្រូវបានស្វាគមន៍ដោយអ្នកគាំទ្រមួយចំនួន ប៉ុន្តែក៏មានអ្នកប្រឆាំងខ្លាំងផងដែរ ដោយសកម្មជនម្នាក់បានជះវត្ថុរាវពណ៌ក្រហមទៅលើរូបលោក មុនពេលជននោះត្រូវបាននគរបាលចាប់ឃាត់ខ្លួន។

អំឡុងពេលថ្លែងទៅកាន់អ្នកសារព័ត៌មាន លោក Pahlavi បានអំពាវនាវដល់រដ្ឋាភិបាលអឺរ៉ុបដែលមិនបានពាក់ព័ន្ធនឹងសង្គ្រាមអាមេរិក-អ៊ីស្រាអែល ប្រឆាំងនឹងអ៊ីរ៉ង់ ឲ្យចាត់វិធានការផ្សេងទៀត រាប់ចាប់ពីការបណ្តេញឯកអគ្គរដ្ឋទូតអ៊ីរ៉ង់ រហូតដល់ការជួយពលរដ្ឋអ៊ីរ៉ង់ឲ្យបានប្រើប្រព័ន្ធអ៊ីនធឺណិតដែលត្រូវបានរារាំង។

លោក Pahlavi ដែលកំពុងធ្វើទស្សនកិច្ចនៅប្រទេសអាល្លឺម៉ង់ បន្ទាប់ពីឈប់សំចតនៅស៊ុយអែត និងអ៊ីតាលី បាននិយាយថា៖ «និទានកថាទាំងមូលនៃបទឈប់បាញ់ និងការចរចា នៅតែផ្អែកលើការគិត ដែលថា អ្នកនឹងដោះស្រាយជាមួយក្រុមបុគ្គលដែលភ្លាមៗ បានក្លាយជាជនហេតុការណ៍និយម»។

លោក Pahlavi បានបន្ថែមថា៖ «អ៊ីរ៉ង់បានសម្លាប់ពលរដ្ឋស្លូតត្រង់រាប់ពាន់នាក់ ហើយគំរាមកំហែងអឺរ៉ុបដោយមីស៊ីលរយៈចម្ងាយឆ្ងាយ។ គ្មានកិច្ចព្រមព្រៀងណាមួយ នឹងដោះស្រាយបញ្ហានេះបានទេ។ គ្មានការចរចាណាមួយ នឹងដោះស្រាយបញ្ហានេះបានទេ។ វាស្ថិតនៅក្នុង DNA របស់ពួកគេរួចហើយ»៕