ភ្នំពេញ៖ ឱកាសការងារចំនួន ៣.២១៦ កន្លែង ក្នុងមុខជំនាញផ្សេងៗគ្នាជាច្រើន ត្រូវបានផ្តល់ជូនពីក្រុមហ៊ុនធំៗចំនួន១៨ នៅក្នុងវេទិកាការងារ សហការរៀបចំដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ជាមួយនឹងសហភាពសហព័ន្ធយុវជនកម្ពុជា នៅព្រឹកថ្ងៃទី០៨ ខែមេសានេះ នៅក្នុងបរិវេណក្រសួងការងារ និងបណ្តុះបណ្តាលវិជ្ជាជីវៈ។

ចំពោះសិស្សនិស្សិត និងអ្នកកំពុងតែស្វែងរកការងារ ឬចង់ផ្លាស់ប្តូរការងារអាចយកប្រវត្តិរូបសង្ខេប (CV) ដើម្បីចូលរួមដាក់ពាក្យផ្ទាល់ និង​សម្ភាសន៍​ផ្ទាល់​ជា​មួយ​អ្នក​តំណាង​ក្រុមហ៊ុន​ទាំងនោះ​បាន​ភ្លាមៗ​ក្នុងថ្ងៃតែមួយតែម្តង។

ក្រុមហ៊ុនធំៗទាំង១៨ ដែលនឹងចូលរួម​ជ្រើសរើស​បុគ្គលិក​ក្នុង​វេទិកា​ការងារ​របស់NEA នោះរួមមាន៖ ធនាគារកាណាឌីយ៉ា, គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី , ក្រុមហ៊ុន EMD (F&B) Co.,ltd, GGear Group Co., Ltd, Kim Mex Construction and Investment Co., LTD, ក្រុមហ៊ុន CHIP MONG GROUP, TH GROUP, PHNOM PENH HOTEL, ម៉ាស្ទ័រ ស៊ុគីស៊ុប, DEWHIRST EST.1880, DENSO (CAMBODIA) CO., LTD , BIMA, LOPFORM, KK FUND LEASING PLC, ក្រុមហ៊ុនជប៉ុន Sumi (Cambodia) Wiring System CO.LTD, ក្រុមហ៊ុនជប៉ុន Minebea Mitsumi, CC-REALTY។

គួរ​បញ្ជាក់​ផង​ដែរថា ​រាល់ពេលនៃការ​រៀបចំ​វេទិកា​ការងារ ​ឬ​កិច្ចសម្ភាសន៍​ការងារ ទីភ្នាក់ងារជាតិ​មុខរបរ ​និងការងារ ​តែងតែ​អនុវត្តន៍​យ៉ាងម៉ត់ចត់​នូវវិធានការណ៍សុវត្ថិភាព​ស្របតាម ការ​ណែនាំ​របស់​ក្រសួងសុខាភិបាលគឺ ​៣ការពារ ៣កុំ ដើម្បីទប់ស្កាត់​ ការឆ្លង ​និងរីករាលនៃជំងឺ កូវីដ-១៩ ដើម្បី​អាចធានា ​បាន​នូវ​សុវត្ថិភាព ​និង​ទំនុក​ចិត្ត​ក្នុង​ការ​ជ្រើសរើស​កម្លាំង​ពលកម្ម ​និង​ទទួលបានឱកាស ការងារ​សម្រាប់​ភាគី​និយោជក​ និង​អ្នក​ស្វែងរកការងារ៕