ភ្នំពេញ៖ សង្រ្កាន្តវត្តភ្នំ ខណៈពេលនេះ គឺកំពុងបន្តរៀបចំតុបតែងលម្អ ដើម្បីធ្វើយ៉ាងណាឱ្យមានភាពរួចរាល់ សម្រាប់ផ្ដល់ការកម្សាន្តជូនប្រជាពលរដ្ឋ ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។

សម្រាប់សង្រាន្តវត្តភ្នំនេះ គឺនឹងមានការលេងល្បែងប្រជាប្រិយគ្រប់ប្រភេទ ការរៀបចំស្តង់ពិព័រណ៍ ក៏ដូចជាការរៀបចំពិធីសាសនាសំខាន់ៗផងដែរ។ នេះជាការលើកឡើងរបស់លោក ជុំ វុឌ្ឍី ប្រធានមន្ទីរវប្បធម៌រាជធានីភ្នំពេញ។

គិតត្រឹមពេលនេះ សង្រាន្តវត្តភ្នំ គឺកំពុងបន្តការរៀបចំយ៉ាងសកម្ម ដើម្បីត្រៀម​ផ្ដល់​ការកម្សាន្ត​ជូន​ប្រជាពលរដ្ឋ។ សម្រាប់ការរៀបចំសង្រាន្តវត្តភ្នំនេះ ​គឺធ្វើឡើងក្នុងរយៈពេល ​៣ថ្ងៃ ចាប់ពីថ្ងៃទី ១៤ ដល់ថ្ងៃទី ១៦ ខែមេសា ជាថ្ងៃចូលឆ្នាំផ្ទាល់តែម្ដង។

សម្រាប់ការរៀបចំនេះ លោក ជុំ វឌ្ឍី ប្រធានមន្ទីរវប្បធម៌ និងវិចិត្រសិល្បៈ រាជធានីភ្នំពេញ លើកឡើងថា នឹងមានការរៀបចំជាការលេងល្បែងកម្សាន្តប្រជាប្រិយ ការរៀបចំស្តង់ពិព័រណ៍ និង​ការរៀបចំពិធីសាសនាសំខាន់ៗ​សម្រាប់ឱកាសចូលឆ្នាំខ្មែរទាំងបីថ្ងៃ។ ​ជាក់ស្ដែងខណៈពេលនេះ កិច្ចការមួយចំនួនបានរៀបចំរួចរាល់ ​ហើយក្រុមការងារនិងក្រុមជាង​ ក៏កំពុងមមាញឹកក្នុងការដំឡើង និងដឹក​ជញ្ជូន​សម្ភារៈចាំបាច់មកទីតាំងវត្តភ្នំផងដែរ។

ខណៈពេលកំពុងរៀបចំកម្មវិធីសង្រាន្តនេះ ក៏មានវត្តមានប្រជាពលរដ្ឋ ជាពិសេសយុវជនមួយចំនួន ចូលមកទស្សនាកម្សាន្តផងដែរ។ ពួកគាត់លើកឡើងថា ​ការរៀបចំកម្មវិធីសង្រាន្តវត្តភ្នំនេះ គឺជារឿង​ប្រសើរ ​ដែលអាចផ្ដល់នូវភាពសប្បាយរីករាយជូនប្រជាពលរដ្ឋដែល ពុំបាន​ចាកចេញ​ពីរាជធានី​ភ្នំពេញ។​ ជាពិសេសគឺបង្ហាញដល់យុវជន ​ឱ្យស្វែងយល់កាន់តែច្រើនពី ​កម្មវិធីសាសនា​សំខាន់ៗ ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។

ឆ្នាំ២០២២នេះជាឆ្នាំដំបូងដែលកម្ពុជា បានរៀបចំពិធីបុណ្យ ​ចូលឆ្នាំប្រពៃណីជាតិខ្មែរ ក្រោយ​ខកខាន​ការរៀបចំរយៈពេល ២ឆ្នាំ ​ដោយសារកូវីដ-១៩ ។ ​ ការសម្រេចរៀបចំនេះ ក៏ស្របពេល​ដែលកម្ពុជាសម្រេចបានជោគជ័យក្នុងយុទ្ធនាការចាក់វ៉ាក់សាំង ​និងគ្រប់គ្រងការឆ្លងកូវីដ-១៩​បានល្អប្រសើរ ​ដោយការឆ្លងប្រចាំថ្ងៃ គឺស្ថិតក្នុងចំនួន​ ២ខ្ទង់ក្នុងមួយថ្ងៃប៉ុណ្ណោះ៕ អត្ថបទ៖ គឹមហុក