អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃព្រហស្បតិ៍បានអំពាវនាវឱ្យប្រទេសនានា ដាក់ទណ្ឌកម្មតឹងរ៉ឹងបន្ថែមទៀតលើប្រទេសរុស្ស៊ី ក្នុងគោលបំណងដើម្បីព្យាយាមបញ្ចប់សង្គ្រាម។ ថ្លែងនៅក្នុងសុន្ទរកថា លោក Zelenskyy បាននិយាយថា ទណ្ឌកម្មបច្ចុប្បន្នគឺមិនទាន់គ្រប់គ្រាន់ ជាអ្វីដែលត្រូវការចាំបាច់ដើម្បីបញ្ឈប់រុស្ស៊ី និងបញ្ឈប់សង្គ្រាមនោះទេ។
លោកបានអំពាវនាវឲ្យប្រទេសនានាផ្គត់ផ្គង់សព្វាវុធបន្ថែមទៀតដល់អ៊ុយក្រែន។ លោកបាននិយាយថា អ៊ុយក្រែនត្រូវការអាវុធដែលអាចឱ្យយើងឈ្នះនៅលើសមរភូមិ។ សម្ព័ន្ធមិត្តប្រទេសលោកខាងលិចបានបង្កើនទណ្ឌកម្មផ្នែកហិរញ្ញវត្ថុដាក់ទៅលើទីក្រុងមូស្គូ។ កាលពីថ្ងៃព្រហស្បតិ៍ សភាសហរដ្ឋអាមេរិកបានបោះឆ្នោតដើម្បីផ្អាកទំនាក់ទំនងពាណិជ្ជកម្មជាមួយរុស្ស៊ី និងហាមឃាត់ការនាំចូលប្រេងពីរុស្ស៊ី ខណៈដែលសហភាពអឺរ៉ុបបានអនុម័តទណ្ឌកម្មថ្មី រួមមានទាំងបម្រាមហាមឃាត់លើការនាំចូលធ្យូងថ្ម។
នៅក្នុងសុន្ទរកថាលោកZelenskyy បានស្វាគមន៍ចំពោះវិធានការរបស់មហាសន្និបាតអង្គការសហប្រជាជាតិ។ លោកនិយាយថា ប្រទេសរុស្ស៊ីកំពុងប្រមូលសាកសពប្រជាជនដែលត្រូវបានសម្លាប់នៅក្នុងទីក្រុង Mariupol ដែលលោកបាននិយាយថា បន្ទាប់មកអាចត្រូវបានប្រើប្រាស់ដើម្បីចោទប្រកាន់កងកម្លាំងអ៊ុយក្រែនថា បានសម្លាប់ប្រជាជនរបស់រុស្ស៊ី។ មេដឹកនាំអ៊ុយក្រែនបានស្វាគមន៍ ចំពោះការវិលត្រឡប់មកវិញរបស់អ្នកការទូតទួរគី ស្លូវេនី និងប្រទេសលីទុយអានីមកកាន់ទីក្រុងគីវ ដោយអំពាវនាវឱ្យប្រទេសផ្សេងទៀតបើកស្ថានទូតរបស់ពួកគេ ឡើងវិញនៅក្នុងរដ្ឋធានីនេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
