បាល់ទាត់៖ សមាគមបាល់ទាត់ទ្វីបអឺរ៉ុប UEFA បានប្រកាសពីបទបញ្ញត្តិហិរញ្ញវត្ថុថ្មី ដើម្បីគ្រប់គ្រងការចាយវាយរបស់ក្លិបបាល់ទាត់អាជីពមកត្រឹម ៧០% ប៉ុណ្ណោះនៃប្រាក់ចំនូលរបស់ខ្លួន ដែលរួមមានទាំងការចាយវាយលើប្រាក់ឈ្នួល ការទិញដូរកីឡាករ និងការចំណាយលើភ្នាក់ទិញដូរ។
រយៈពេលបីឆ្នាំកន្លងមកនៃការខាតបង់បានកើនឡើងពី ៣០លានអឺរ៉ូដល់ ៦០លានអឺរ៉ូជាមធ្យម។ ច្បាប់ថ្មីនឹងត្រូវបានអនុម័តនៅខែមិថុនាខាងមុខ ខណៈក្លិបទាំងអស់មានពេលបីឆ្នាំដើម្បីអនុវត្ត។ មិនប្រញាប់ពេកទេ ការអនុវត្តច្បាប់ថ្មីនេះនឹងត្រូវបានធ្វើជាដំណាក់កាលដោយក្លិបទាំងអស់អាចចំណាយដល់ ៩០% នៃប្រាក់ចំនូលនៅរដូវកាល ២០២៣-២៤ ថយមក ៨០% នៃប្រាក់ចំនូលនៅរដូវកាល ២០២៤-២៥ និងថយដល់ ៧០% ចាប់ពីរដូវកាលបន្ទាប់តទៅ។ បទបញ្ញត្តិថ្មីនេះចេញជារូបរាងតាមរយៈការរួមបញ្ចូលគ្នារបស់ UEFA និងសមាគមក្លិបបាល់ទាត់អឺរ៉ុប ECA ដែលជាកំណែទម្រង់ថ្មីមួយលើកដំបូង ចាប់តាំងពីច្បាប់គ្រប់គ្រងការចាយវាយត្រូវបានបង្កើតឡើងនៅឆ្នាំ២០១០។
សូមបញ្ជាក់ថា បច្ចុប្បន្ននេះក្លឹបអាចចំណាយរហូតដល់ ៥លានអឺរ៉ូច្រើនជាងពួកគេរកបានក្នុងរយៈពេលវាយតម្លៃបីឆ្នាំ។ ទោះជាយ៉ាងណាក៏ដោយ ពួកគេអាចចាយលើសដល់ដែនកំណត់ ៣០លានអឺរ៉ូ ប្រសិនបើវាត្រូវបានបោះទុនទាំងស្រុងដោយការរួមចំណែកផ្ទាល់ / ការបង់ប្រាក់ពីម្ចាស់ក្លឹប ឬភាគីពាក់ព័ន្ធ។ យោងតាម UEFA គំនិតនេះគឺដើម្បី "ទប់ស្កាត់ការឡើងនៃបំណុលដែលមិនស្ថិតស្ថេរ"៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
