យុវជន លើកឡើងថា ពួកគេគាំទ្រច្បាប់កាតព្វកិច្ចយោធា និងត្រៀមខ្លួនជាស្រេចហើយ ដើម្បី​បំពេញ​កាតព្វកិច្ចយោធា ពីព្រោះច្បាប់នេះ ក្រៅតែពីកសាងកម្លាំងការពារជាតិ ក៏ជាមូលដ្ឋានគ្រឹះ នៃ​ប្រភពសាងសង់កម្លាំងស្នេហាជាតិ ធ្វើឲ្យយុវជនកាន់តែ មានវិន័យល្អផងដែរ។

យុវជន ដែលកំពុងសិក្សានៅសាកលវិទ្យាល័យជាតិគ្រប់គ្រង សាខាវាលស្បូវ បានប្រាប់ BTV នៅ​ថ្ងៃ​ទី២៧ ខែមេសា ឆ្នាំ២០២៦នេះ ថា ពួកគេ គាំទ្រការអនុម័តច្បាប់កាតព្វកិច្ចយោធា ពីព្រោះ​ច្បាប់​នេះ នឹងធ្វើឲ្យកម្ពុជាមានភាពរឹងមាំ លើការកសាងកម្លាំងការពារជាតិ។ សម្រាប់ពួកគេ បើ​ទោះ​បី​បារម្ភថា ពេលចូលហ្វឹកហាត់ជាកងទ័ព អាចភ្លេចមេរៀននៅសាកលវិទ្យាល័យខ្លះ ប៉ុន្ដែ​ពួក​គេ​ត្រៀម​ខ្លួនជាស្រេចហើយ ដើម្បីចូលរួមក្នុងកម្លាំងការពារជាតិ។

សូមជម្រាបជូនថា ច្បាប់កាតព្វកិច្ចយោធា ត្រូវបានរាជរដ្ឋាភិបាល អនុម័ត កាលពីថ្ងៃទី២៣ ខែ​មេសា ឆ្នាំ២០២៦ ដោយប្រកាសជាប្រញាប់ ដោយច្បាប់នេះ មានវិសាលភាព អនុវត្ត​លើ​ប្រជាព​លរដ្ឋ​ខ្មែរគ្រប់រូប ដែលមានអាយុពី១៨ ដល់ ២៥ឆ្នាំ ខណៈស្រ្ដីផ្អែកតាមការស្ម័គ្រចិត្ត។ សម្ដេច​មហា​បវរ​ធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា កាលពីថ្ងៃទី២៦ ខែ​មេសា ​ឆ្នាំ២០២៦ បានថ្លែងបញ្ជាក់ថា ច្បាប់កាតព្វកិច្ចយោធា នឹងត្រូវធ្វើឡើង​សម្រាប់​យុវជន​ស្ម័គ្រ​ចិត្ត​ជាមុន ហើយបន្ទាប់មក នឹងមានការចាប់ឆ្នោត។

ច្បាប់ស្ដីពីកាតព្វកិច្ចយោធា មិនមែនគ្រាន់តែជាការតម្រូវឲ្យយុវជនចូលបម្រើកងទ័ពប៉ុណ្ណោះទេ ប៉ុន្ដែ​នេះគឺជាយន្ដការដ៏សំខាន់ក្នុងការកសាងជាតិ តាមរយៈការអប់រំ បណ្ដុះ​បណ្ដាល​ឲ្យ​យុវជន​មាន​វិន័យ​ល្អ និងមនសិកាស្នេហាជាតិ៕ អត្ថបទ ៖ លៀ ស៊ីណា