​អ៊ុយក្រែន៖ មន្ត្រី​កំពូល​សហភាព​អឺរ៉ុប​ ២​រូប​បាន​ធ្វើ​ដំណើរ​ទៅកាន់​ប្រទេស​អ៊ុយ​ក្រែ​ន​កាលពី​ថ្ងៃ​សុក្រ ដើម្បី​ព្យាយាម​ស្វែងរក​ការ​បង្កើន​ការ​គាំទ្រ​របស់​សហភាព​អឺរ៉ុប​សម្រាប់​ប្រទេស​អ៊ុយ​ក្រែ​ន​។​ ​ប្រធាន​គណៈកម្មការ​ស​ហ​ភាព​អឺរ៉ុប​លោកស្រី Ursula von der Leyen បាន​ទៅ​ពិនិត្យ​មើល​ផ្នូរ​ធំ​នៅ​ក្នុង​ក្រុង Bucha រួម​ជាមួយ​ប្រធាន​គោលនយោបាយ​ការបរទេស​​សហភាព​អឺរ៉ុប​លោក Josep Borrell ដោយ​បាន​និយាយ​ថា ជា​អ្វី​ដែល​មិន​នឹកស្មាន​ដល់​បាន​កើតឡើង​នៅ​ទីនេះ​។

​

លោកស្រី von der Leyen បាន​និយាយ​ក្នុង​អំឡុង​ដំណើរ​ចុះ​ពិនិត្យ​ទៅកាន់​ទីក្រុង Bucha ថា យើង​បាន​ឃើញ​ភាព​ឃោរឃៅ​ហួសហេតុ​របស់​កងទ័ព​លោក ​Putin​។ រូបភាព​សាកសព​រាយប៉ាយ​នៅ​តាម​ផ្លូវ បន្ទាប់ពី​កង​កម្លាំង​រុស្ស៊ី​ដក​ថយ​បាន​ធ្វើ​ឲ្យ​ពិភពលោក​ភ្ញាក់​ផ្អើល​។ ​លោកស្រី Von der Leyen និយាយ​ថា សហភាព​អឺរ៉ុប​នឹង​គាំទ្រ​អ៊ុយ​ក្រែ​ន​តាម​មធ្យោបាយដែលអាច​ធ្វើ​ទៅ​បាន និង​ផ្តល់​អាវុធ​ដល់​ទាហាន​អ៊ុយ​ក្រែ​ន​ក្លាហាន ​ដើម្បី​ការពារ​ប្រទេស​របស់​ពួកគេ​។ លោក​ស្រី​និយាយ​ថា វា​មាន​សារៈសំខាន់​បំផុត​ក្នុង​ការ​ធ្វើ​ឱ្យ​ប្រាកដ​ថា ពួកគេ​មាន​យុទ្ធោបករណ៍ដែលចាំបាច់​ដើម្បី​ការពារ​អ៊ុយ​ក្រែ​ន ប៉ុន្តែ​ក៏​ដើម្បី​ទប់ទល់​អ្នក​ឈ្លានពាន​។​ លោកស្រី​នឹង​ធ្វើ​ការ​ជាមួយ​នាយករដ្ឋមន្ត្រី​អ៊ុយ​ក្រែ​ន​លោក Denys Shmyhal និង​ប្រធានាធិបតីលោក Zelenskyy លើ​ដំណើរការ​អ៊ុយ​ក្រែ​ន​ចូល​ជា​សមាជិក​សហភាព​អឺរ៉ុប៕

អត្ថបទ៖ ប៊ុនថន