ទីភ្នាក់ងារសារព័ត៌មាន Yonhap នៅថ្ងៃអង្គារ (ទី២៨ ខែមេសា ឆ្នាំ២០២៦) នេះ បានរាយការណ៍ថា ប្រទេសកូរ៉េខាងត្បូងបានអំពាវនាវឲ្យមានវិធានការជាអន្តរជាតិយ៉ាងឆាប់រហ័ស ដើម្បីដោះស្រាយបញ្ហានុយក្លេអ៊ែររបស់កូរ៉េខាងជើង ដោយចាត់ទុកថា នេះគឺជាការគំរាមកំហែងដ៏បន្ទាន់បំផុត ចំពោះប្រព័ន្ធមិនរីកសាយភាយអាវុធនុយក្លេអ៊ែរទូទាំងពិភពលោក។

អនុរដ្ឋមន្ត្រីការបរទេស លោក Jeong Yeon-doo បានធ្វើការកត់សម្គាល់បែបនេះ ក្នុងអំឡុងពេលមានសន្និសីទ ស្តីពីសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) នៅទីក្រុងញូវយ៉ក សហរដ្ឋអាមេរិក ដោយសង្កត់ធ្ងន់ថា ទីក្រុងព្យុងយ៉ាង នៅតែជាបញ្ហាប្រឈមតែមួយគត់ បន្ទាប់ពីបានដកខ្លួនចេញពីសន្ធិសញ្ញា និងបន្តការអភិវឌ្ឍអាវុធនុយក្លេអ៊ែររបស់ខ្លួន។

លោក Jeong បាននិយាយថា៖ «កូរ៉េខាងជើង គឺជាករណីតែមួយគត់ដែលទទួលបានអត្ថប្រយោជន៍ពីប្រព័ន្ធ NPT ប្រកាសដកខ្លួនចេញ និងបន្តការអភិវឌ្ឍអាវុធនុយក្លេអ៊ែរដោយបើកចំហ ដោយហេតុនេះ នេះនៅតែជាបញ្ហាប្រឈមដ៏បន្ទាន់បំផុត ចំពោះប្រព័ន្ធមិនរីកសាយភាយអាវុធនុយក្លេអ៊ែរ»។

ជាមួយគ្នានេះ លោកបានជំរុញឲ្យសហគមន៍អន្តរជាតិផ្តល់សាររួមមួយ ដែលថា អនាគតសន្តិសុខ និងសេដ្ឋកិច្ចរបស់កូរ៉េខាងជើង ពឹងផ្អែកលើការវិលត្រឡប់ទៅរកក្របខ័ណ្ឌសន្ធិសញ្ញាវិញ៕