តាកែវ៖ នៅក្នុងឱកាសបុណ្យចូលឆ្នាំថ្មី ជិតឈានចូលមកដល់សំគាល់ឃើញថា បណ្តាសាលារៀនរដ្ឋ និងឯកជនមួយចំនួនធំនៅក្នុងក្នុងក្រុងដូនកែវ ខេត្តតាកែវ បានរៀបចំសង្ក្រាន្តឆ្នាំថ្មី និងលេងល្បែងប្រជាប្រិយកម្សាន្ត ដើម្បីអបអរសាទរពិធីបុណ្យចូលឆ្នាំថ្មី ។

បើក្រុមនិស្សិត នៃសាលាបៀលប្រាយនៅខេត្តតាកែវ បានថ្លែងប្រាប់BTV នៅថ្ងៃទី៩ ខែមេសានេះ នៅក្នុងឆ្នាំនេះ រដ្ឋបាលខេត្តតាកែវ គឺបានអនុញ្ញាតបណ្តាវត្តអារ៉ាម រមណីយដ្ឋានទេសចរណ៍ និងគ្រឹះស្ថាន​សហគ្រាសរដ្ឋ និងឯកជន រៀបចំកម្មវិធីបុណ្យចូលឆ្នាំប្រពៃណីបុណ្យចូលឆ្នាំថ្មី ដែលនឹងឈានចូលមកដល់នៅថ្ងៃទី១៤ ដល់ថ្ងៃទី១៦ ខែមេសា នេះ តាមគោលការណ៍​ណែនាំ​របស់រាជរដ្ឋាភិបាល។

ក្រុមនិស្សិតថ្លែងថា ដោយសារមានអនុញ្ញាតនេះ ទើបអោយបណ្តាសាលារៀន​នានា​មាន​វិទ្យាល័យ​ជាស៊ីមតាកែវ ​និងសាលាគរុកោសល្យភូមិភាគខេត្តតាកែវ ​ក៏ដូចសាលាបៀលប្រាយ បាន​ធ្វើរៀបចំ​កម្ម​វិធីសង្ក្រាន្តមុនថ្ងៃបុណ្យចូលឆ្នាំ ដើម្បីបង្កើនភាព​ស្និតស្នាល​មុនថ្ងៃឈប់សំរាកបុណ្យចូលឆ្នាំថ្មី។

សូមបញ្ជាក់ថា តាមការគ្រោងទុកនៅក្នុងឆ្នាំនេះ រដ្ឋបាលខេត្តតាកែវ នឹងរៀបចំសង្ក្រាន្តឆ្នាំថ្មីធំមួយ​នៅ​សួនមាត់បឹងខេត្តតាកែវ ​រយៈពេលបីថ្ងៃ ​ចាប់ពីថ្ងៃទី១៤ដល់ថ្ងៃទី១៦​ ខែមេសា ខណៈ មកដល់​ថ្ងៃនេះ​នៅ​សួន​មាត់បឹងខេត្តតាកែវ ​គឺ​អាជ្ញាធរ​មូលដ្ឋានបានចាប់​ផ្តើមរៀបចំឆាក ​តុបតែងលំអរ ដើម្បី​ត្រៀមធ្វើកម្មវិធីសង្ក្រាន្តឆ្នាំថ្មីដើម្បីអបអរសារទរពិធីបុណ្យចូលឆ្នាំថ្មីប្រពៃណីជាតិខ្មែរ ៕ អត្ថបទ៖ ស៊ុម សុខជា