ភ្នំពេញ៖ មន្រ្តីជាន់ខ្ពស់ក្រសួងអប់រំ យុវជន និងកីឡា ថា ការវិនិយោគក្នុងវិស័យអប់រំ គឺការពង្រីកលើផ្នែកចំណេះដឹង អាចឲ្យសិស្សទៅធ្វើការងារ ការស្វែងរកប្រាក់ចំណូល ដើម្បីចិញ្ចឹមជីវិត ចិញ្ចឹមគ្រួសារ ការជួយដល់សហគមន៍ នឹងការចូលរួមចំណែកដល់សេដ្ឋកិច្ច-សង្គម។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំយុវជន និងកីឡា បានលើកឡើង​នៅ​ក្នុងពិធីប្រគល់​សញ្ញាបត្រ ថ្នាក់បរិញ្ញាបត្រ ​ជូន​ជ័យលាភី​កម្មវិធី​លើក​កម្ពស់​គុណវុឌ្ឍ​គណៈគ្រប់គ្រងសាលារៀនជំនាន់ទី១ ​និងជំនាន់ទី២ និង​កម្មវិធីលើកកម្ពស់ គុណវុឌ្ឍ​គ្រូបង្រៀន​ជំនាន់ទី ២ និងទី៣ ចំនួន​ជាង ៣០០នាក់ នៅថ្ងៃទី៩ ខែ មេសា ឆ្នាំ២០២២ ​នេះថា​ ជុំវិញវិស័យអប់រំ ក្រសួង​បានធ្វើការកែទម្រង់​កម្មវិធីសិក្សាជាច្រើន ​ជាក់​ស្តែង​កម្ម​វិធី​លើក​កម្ពស់​គុណវុឌ្ឍ​គណៈគ្រប់​គ្រងសាលារៀន​ និងកម្មវិធីលើកកម្ពស់គុណវុឌ្ឍគ្រូបង្រៀន​ គឺជា​ការផ្តល់ឱកាសជូនលោកគ្រូអ្នកគ្រូ និង​អ្នកគ្រប់គ្រង​នៅសាលារៀន ដើម្បីតម្រង់ទិសនៃការសិក្សាឲ្យស្រប​តាមគោលនយោបាយ​របស់​រាជ​រដ្ឋាភិបាល ​ដែលជាគោលនយោបាយត្រូវ ​និងបានដាក់ចេញចំពេលវេលា ក្នុងការជម្រុញ​ការអភិវឌ្ឍ​ធនធានមនុស្ស។

ឯកឧត្តម រដ្ឋមន្រ្តី បន្តថា តាមរយៈគម្រោងខាងលើ, ក្នុងរយៈពេលកន្លងទៅ គម្រោងនេះបានកែប្រែ​មុខមាត់សាលារៀន ​ការកែប្រែនូវវប្បធម៌នៃសាលារៀន និងបានបង្កើតនូវ​បរិស្ថាន​អំណោយ​ផល​នៅតាមសាលារៀន ដើម្បីឲ្យសិស្សានុសិស្សរៀនសូត្រទទួល​បាន​ចំណេះដឹងពិតប្រាកដរួមមាន ចំណេះដឹង​លើផ្នែកមុខវិជ្ជា ​ចំណេះដឹងលើការស្វែករកប្រាក់ចំណូល ​និងបានពង្រីកចំណេះដឹងទៅ​ដល់សហគមន៍​ លើការកែលម្អសាលារៀនផងដែរ។

ឯកឧត្តម ហង់ ជួនណារ៉ុន បន្តលើកឡើងថា ចំណែកជុំវិញការសិក្សានៅក្នុងស្ថានភាពនៃការរីក​រាលដាល​ជម្ងឺកូវីដ ១៩ នេះ លោកគ្រូអ្នកគ្រូ ​និងអ្នកគ្រប់គ្រងសាលា ​បានចូលរួមយ៉ាងសំខាន់ និង​បានប្រែក្លាយវិបត្តិកូវីដនេះ ​ឲ្យក្លាយទៅជាឱកាសនៃការប្រើប្រាស់បច្ចេកវិទ្យា​លើការបង្រៀន និង​ការរៀនសូត្ររបស់សិស្ស ។​ ចំណែកលោកគ្រូអ្នកគ្រូដែលមិនបានចូលក្នុងគម្រោងនេះ នឹង​អាចទទួលបាននូវផលជះពីគម្រោងនោះផងដែរ ​ដើម្បីជួយកែ​លម្អនៃវិធីសាស្រ្តបង្រៀន និង​ការជួយចែករំលែកនូវបទពិសោធន៍ល្អៗ ​ក្នុងទិសដៅឲ្យសិស្សានុសិស្សបានរៀនសូត្រ និងការ​ទទួល​បានចំណេះដឹងពិតប្រាកដ។

សូមបញ្ជាក់ថា៖ កម្មវិធីលើកកម្ពស់គុណវុឌ្ឍិគណៈគ្រប់គ្រង​សលារៀន និងកម្មកម្មវិធីលើក​កម្ពស់​គុណវុឌ្ឍិគ្រូបង្រៀន​ ក្រោមគម្រោងកែលម្អការអប់រំនៅមធ្យមសិក្សា បានដាក់ឱ្យអនុវត្ត​នៅ​សាកលវិទ្យាល័យភូមិន្ទភ្នំពេញ ​មានរយៈពេល ៥ឆ្នាំ ​គឺចាប់ពីឆ្នាំ២០១៧ ដល់ឆ្នាំ២០២២ ។ តាមរយៈការបណ្តុះបណ្តាលក្នុងកម្មវិធីលើក​កម្ពស់គុណវុឌ្ឍិគណៈគ្រប់គ្រង​សាលារៀន បាន​ជ្រើសរើស​គណៈគ្រប់គ្រងសាលារៀន​នៅ​កម្រិតមធ្យមសិក្សា ​ដែលមាន​សាលាគោលដៅ​ចំនួន​១០០ សាលារៀនក្រៅគោលដៅសរុបចំនួន ២០១សាលារៀន និងអ្នកសិក្សាមកពីនាយកដ្ឋាន​អប់រំសរុបចំនួន៥ និងគ្រឹះស្ថាន​បណ្តុះបណ្តាល​គ្រូបង្រៀនជាង​៣០អង្គភាព​នៅ​ទូទាំង​ប្រទេសប្រទេសកម្ពុជា៕ អត្ថបទ៖ សុន រ៉ាឌី