លោកប្រធានាធិបតី Volodymyr Zelenskyy បាននិយាយនៅថ្ងៃពុធ (ទី២៩ ខែមេសា ឆ្នាំ២០២៦) នេះថា ប្រទេសអ៊ុយក្រែននឹងបន្តបង្កើនចម្ងាយវាយប្រហាររបស់ខ្លួន នៅក្នុងប្រទេសរុស្ស៊ី ដោយបានបង្ហោះវីដេអូនៃអ្វីដែលលោកបានប្រាប់ថា ជាការវាយប្រហារលើគោលដៅមួយ នៅចម្ងាយជាង ១.៥០០គីឡូម៉ែត្រ។

អ៊ុយក្រែន បានបង្កើនការវាយប្រហាររបស់ខ្លួន ទៅលើរុស្ស៊ី ក្នុងរយៈពេលប៉ុន្មានសប្តាហ៍ថ្មីៗនេះ ដោយមានគោលបំណងបំផ្លាញរោងចក្រចម្រាញ់ប្រេង ឃ្លាំងស្តុក និងកំពង់ផែ ហើយនិងធ្វើឲ្យប៉ះពាល់ដល់ប្រភពហិរញ្ញប្បទានដ៏ធំបំផុតរបស់ទីក្រុងមូស្គូ សម្រាប់សង្គ្រាមរបស់ខ្លួន នៅអ៊ុយក្រែន ខណៈដែលតម្លៃប្រេងសកលបានហក់ឡើងដោយសារតែសង្គ្រាមអ៊ីរ៉ង់។

តាមរយៈការបង្ហោះមួយនៅលើបណ្ដាញសង្គម X លោក Zelenskyy បាននិយាយថា សេវាសន្តិសុខរបស់អ៊ុយក្រែន បានរាយការណ៍ពីការវាយប្រហារដ៏ជោគជ័យមួយ នៅក្នុងប្រទេសរុស្ស៊ី ដោយចាត់ទុកវាថា ជា «ដំណាក់កាលថ្មីមួយក្នុងការប្រើប្រាស់អាវុធអ៊ុយក្រែន ដើម្បីកម្រិតសក្តានុពលនៃសង្គ្រាមរបស់រុស្ស៊ី»។

ប្រធានាធិបតីអ៊ុយក្រែនបានបង្ហោះវីដេអូដែលបង្ហាញឲ្យឃើញផ្សែងហុយទ្រលោមឡើងទៅលើមេឃ ប៉ុន្តែមិនបានប្រាប់អត្តសញ្ញាណទីតាំងគោលដៅដែលត្រូវបានវាយប្រហារនោះទេ។ លោកបានបន្ថែមថា «ចម្ងាយត្រង់ គឺលើសពី ១.៥០០គីឡូម៉ែត្រ។ យើងនឹងបន្តពង្រីករយៈច្ងាយវាយប្រហារទាំងនេះ»។

សេវាសន្តិសុខអ៊ុយក្រែន SBU បានឲ្យដឹងនៅក្នុងការបង្ហោះនាពេលក្រោយថា យានដ្រូនរបស់ខ្លួន បានវាយប្រហារស្ថានីយបូមប្រេងមួយកន្លែងរបស់រុស្ស៊ី នៅជិតទីក្រុង Perm នាពេលយប់ ដោយមានចម្ងាយប្រហែល ១.៥០០គីឡូម៉ែត្រពីអ៊ុយក្រែន។

កាលពីថ្ងៃអង្គារ ការវាយប្រហារដោយយានដ្រូនរបស់អ៊ុយក្រែនបានបណ្តាលឲ្យមានអគ្គិភ័យដ៏ធំ នៅរោងចក្រចម្រាញ់ប្រេងរបស់រុស្ស៊ី នៅកំពង់ផែសមុទ្រខ្មៅ Tuapse ដែលជាការវាយប្រហារលើកទី៣ លើរោងចក្រចម្រាញ់ប្រេងក្នុងរយៈពេលមិនដល់ ២សប្តាហ៍។ ប្រធានាធិបតីរុស្ស៊ី លោក Vladimir Putin បានពិពណ៌នាអំពីការវាយប្រហារនេះថា ជាភស្តុតាងនៃការវាយប្រហាររបស់អ៊ុយក្រែនកាន់តែខ្លាំងឡើងៗ លើគោលដៅស៊ីវិល៕