កំពត៖ រមណីយដ្ឋាន និងកន្លែងស្នាក់នៅក្នុងខេត្តកំពត ក្រៅពីបានតុបតែងលម្អសម្រាប់ចូលរួមសង្ក្រាន្តឆ្នាំថ្មីហើយនោះ ក៏បានពង្រឹងសេវាកម្មរបស់ខ្លួនបន្ថែមឲ្យកាន់តែប្រសើរ ពិសេសបានរៀបចំកម្មវិធីសប្បាយៗ ជាច្រើនសម្រាប់ភ្ញៀវកម្សាន្ត នាឱកាសបុណ្យចូលឆ្នាំថ្មី។

សេវាកម្មទេសចរណ៍ផ្សេងៗ អាចមានការដំឡើងថ្លៃ​បន្តិចបន្តួច។ មន្ត្រីជំនាញ បានឱ្យដឹងថា ការកក់បន្ទប់ស្នាក់នៅទើបបានរង្វង់ ២០ទៅ៣០ភាគរយ។

អ្នកគ្រប់គ្រងរមណីយដ្ឋានដូងទេរ បានឲ្យដឹងថា នៅក្នុងឱកាសបុណ្យចូលឆ្នាំថ្មីនេះ​ កន្លែងរបស់ លោក ​បានត្រៀមលក្ខណៈរួចរាល់ ​ដូចជាពង្រឹងផ្នែកសេវាកម្ម ​បង្កើន​បុគ្គលិកបន្ថែម និង​មាន​រៀបចំកម្មវិធី ​កម្សាន្តសប្បាយជាច្រើនដល់ភ្ញៀវផងដែរ។

ម្ចាស់ផ្ទះលម្ហែ “លម្ហើយ” នៅក្នុងសង្កាត់ក្រើយកោះ ក្រុងកំពត ​បានឲ្យដឹងដែរថា ​ដើម្បីរួមចំណែក ក្នុង​ការទាក់ទាញភ្ញៀវទេសចរឲ្យមកលេងខេត្តកំពត ក្នុងឱកាសបុណ្យចូលឆ្នាំថ្មីកាន់តែច្រើន ពិសេស ដើម្បីប្រកួតប្រជែង​ដណ្តើមទីផ្សារ ​លោកបាន​ច្នៃសេវា​កម្មកម្សាន្តជាច្រើន បញ្ចូល​ជាមួយ​នឹងសេវាស្នាក់នៅតែម្តង។

ភ្ញៀវទេសចរ ដែលទៅកម្សាន្តនៅរមណីយដ្ឋានដូងទេរ ​បានឲ្យដឹងថា ​ពួកគេបានដឹងជាមុនថា ខេត្តកំពត​នឹងមានភ្ញៀវទៅដើរលេងកម្សាន្តច្រើន ​នៅក្នុងឱកាសចូលឆ្នាំ ​ដោយសារកំពត មាន​កន្លែងដើរ លេងច្រើន​ និងស្អាតប្លែកៗ ​ម្យ៉ាងទៀតកម្ពុជា បាន​ខកខាន​ប្រារព្ធពិធី​ចូលឆ្នាំពីរឆ្នាំ​រួចមកហើយ ​ជាងនេះ ​ទៅទៀតប្រជាពលរដ្ឋ ​ហាក់ស៊ាំនឹងការរស់នៅជាមួយនឹងកូវីដ-១៩ ក្រោយ​ពេលបានចាក់វ៉ាក់សាំងបីដង​ ទៅបួនដងរួចមក មិ​នសូវមានការភ័យខ្លាចខ្លាំង។ ដូច្នេះ​ដើម្បីភាពងាយស្រួល​ ពួកគេនាំគ្នាមកលេងមុន ​ពេលចូលឆ្នាំតែម្តង ។

ប្រធានមន្ទីរទេសចរណ៍ខេត្តកំពត ​លោក សយ ស៊ីណុល បានឱ្យដឹងថា ​សម្រាប់ពិធីបុណ្យចូលឆ្នាំ្ម ថ្មីនេះ ​រមណីយដ្ឋាន សហគមន៍​ទេសចរណ៍ ​និងគោលដៅទាក់ទាញ​ទេសចរទាំង៣៤កន្លែង និង​កន្លែង ស្នាក់ជាង៣០០កន្លែង។ ក្នុងខេត្តបានរៀបចំតុបតែងលម្អ ​និងទីតាំងសង្ក្រាន្តឆ្នាំថ្មីរៀងៗខ្លួន។ ​ហើយមន្ទីរ មានក្រុមការងារ​បួន​ក្រុមចុះណែនាំអប់រំ ​នៅតាមកន្លែងផ្តល់សេវាកម្មទេសចរណ៍ទាំងអស់នោះ ​ឲ្យរក្សាអនាម័យ សេវាកម្មល្អ ​មិនដំឡើងថ្លៃ ​និងបន្តចូលរួមអនុវត្តវិធានសុវត្ថិភាព SOP ។

លោក បានបន្តថា សម្រាប់ការកក់បន្ទប់ស្នាក់នៅ​ ក្នុងខេត្តកំពត ​នាឱកាសបុណ្យចូលឆ្នាំខាងមុននេះ រង្វង់២០​ ទៅ៣០ភាគ រយ ក្នុងចំណោមបន្ទប់ស្នាក់នៅសរុបជាង៤ពាន់បន្ទប់៕ អត្ថបទ៖ អន សារឹម