ភ្នំពេញ៖ ក្នុងស្មារតីរួមចំណែកសង្គ្រោះជីវិត និងលើកកម្ពស់សុខភាពមហាជន ក្រុមហ៊ុន តូយ៉ូតា (ខេមបូឌា) បានឧបត្ថម្ភមធ្យោបាយធ្វើដំណើររថយន្ត Toyota Hiace (១២ កៅអី) ចំនួន ៣ គ្រឿង ជូនដល់មន្ទីរពេទ្យឆ្នើមៗចំនួន ៣ រួមមាន៖ មន្ទីរពេទ្យគន្ធបុប្ឆា, មន្ទីរពេទ្យកុមារអង្គរ និង​មន្ទីរ​ពេទ្យ​បេះដូងជប៉ុន។ ការឧបត្ថម្ភមធ្យោបាយធ្វើដំណើរនាពេលនេះ ធ្វើឡើងក្នុង​គោល​បំណង​ចម្បង ​ដើម្បីសម្រួលដល់ការដឹកជញ្ជូនអ្នកជំងឺតូចៗ ជាពិសេសកុមារ​ដែល​នៅ​តំបន់​ដាច់​ស្រយាល​ឱ្យទទួលបានសេវាព្យាបាលទាន់ពេលវេលា និងប្រកបដោយសុវត្ថិភាព។

ក្នុងពិធីប្រគល់រថយន្តដែលបានប្រព្រឹត្តទៅកាលពីថ្ងៃទី ២៩ ខែមេសា ឆ្នាំ ២០២៦ លោក ខេន​សុកេ ​ស៊ីជីយ៉ាក់ អគ្គនាយកក្រុមហ៊ុន តូយ៉ូតា (ខេមបូឌា) បានមានប្រសាសន៍ថា ក្រៅពីការ​យក​ចិត្ត​ទុក​ដា​ក់លើវិស័យសុខាភិបាល ក្រុមហ៊ុនក៏បានផ្ដោត​សំខាន់​លើ​ការ​បណ្ដុះ​បណ្ដាល​សក្ដានុពល​យុវជនជំនាន់ក្រោយផងដែរ។ លោកបានបញ្ជាក់ថា សកម្មភាពទាំងនេះឆ្លុះបញ្ចាំង​ពី​បេសក​កម្ម​ "Producing Happiness for All" និងទស្សនវិជ្ជាសកល "Mobility for All"។​ យើង​មិន​មែន​ត្រឹមតែជាអ្នកផលិតរថយន្តនោះទេ ប៉ុន្តែយើងជាអ្នកផ្តល់ដំណោះស្រាយផ្នែកចល័តភាព ដើម្បី​ជួយឱ្យមនុស្សគ្រប់រូបអាចជម្នះរាល់ឧបសគ្គក្នុងជីវិត តាមរយៈយុទ្ធនាការ 'Start Your Impossible។

ដោយឡែក ប្រធានមន្ទីរពេទ្យគឺ មន្ទីរពេទ្យគន្ធបុប្ឆា, មន្ទីរពេទ្យកុមារអង្គរ និង​មន្ទីរ​ពេទ្យ​បេះដូង​ជប៉ុន ​បានបង្ហាញក្តីរំភើបរីករាយ និង ថ្លែងអំណរគុណដល់ក្រុមហ៊ុន តូយ៉ូតា (ខេមបូឌា) ដែល​បា​ន​ឧបត្ថម្ភ​មធ្យោបាយ​ធ្វើ​ដំណើរ​រថយន្ត​ថ្មី​សន្លាង​សម្រាប់​សម្រួល​ដល់​ការ​ដឹក​ជញ្ជូន​អ្នក​ជំងឺ​មក​កាន់​មន្ទីរ​ពេទ្យទាន់ពេលវេលា។

ជាមួយនឹងវត្តមានដ៏រឹងមាំអស់រយៈពេល ៣៣ ឆ្នាំនៅក្នុងប្រទេសកម្ពុជា តូយ៉ូតា​មាន​គោល​ដៅ​ប្រែក្លាយ​ខ្លួន​ជា "ម៉ាកយីហោជាតិ" ដែលរីកចម្រើនទន្ទឹមគ្នាជាមួយប្រជាជនខ្មែរ។ ក្រៅពីការ​គាំទ្រ​ផ្នែក​សុខាភិបាល ក្រុមហ៊ុនក៏បានជំរុញទេពកោសល្យកុមារតាមរយៈកម្មវិធី Toyota Dream Car Art Contest ដែលទើបតែប្រារព្ធខួបលើកទី ១៩ នាពេលថ្មីៗនេះ ដើម្បី​ផ្ដល់​ឱកាស​ឱ្យ​កុមារ​នៅ​តាម​មន្ទីរ​ពេទ្យបានបង្ហាញសមត្ថភាពដូចកុមារដទៃទៀតដែរ។

លើសពីនេះ តូយ៉ូតាបានបង្ហាញ​ពី​ការ​ប្តេជ្ញា​ចិត្ត​ខ្ពស់​ក្នុង​ការ​អភិវឌ្ឍ​ធន​ធាន​មនុស្ស​ក្នុង​ស្រុក​តាម​រយៈ​ កិច្ចសហការជាមួយស្ថាប័ន TVET៖ ដើម្បីបណ្ដុះបណ្ដាល​ជំនាញ​បច្ចេក​ទេស​ដល់​យុវជន​កម្ពុជា​ និងការបង្កើតឱកាសការងារក្នុងវិស័យឧស្សាហកម្ម៖ បច្ចុប្បន្ន ៧៧% នៃបុគ្គលិក​នៅ​ក្នុង​រោង​ចក្រ​ដំឡើងរថយន្ត Toyota Tsusho Manufacturing Cambodia គឺជាសិក្សា​កាម​ដែល​មក​ពី​សាលា​បច្ចេកទេសទាំងនេះ។

ការ​ឧបត្ថម្ភរថយន្ត និងសកម្មភាពសង្គមទាំងអស់នេះ គឺជាសក្ខីភាពបញ្ជាក់ថា តូយ៉ូតា មិន​ត្រឹម​តែ​ផ្ដោត​លើកា​រ​ធ្វើអាជីវកម្មនោះទេ ប៉ុន្តែបាន និងកំពុងរួមចំណែក​យ៉ាង​សកម្ម​ក្នុង​ការ​កសាង​អនាគត​ដ៏​ភ្លឺ​ស្វាង​សម្រាប់កុមារ និងការរីកចម្រើននៃធនធានមនុស្សរបស់កម្ពុជាយ៉ាងពិតប្រាកដ៕ អត្ថបទ៖ ធូ វិរៈ