វត្ថុបុរាណខ្មែរចំនួន ១២២រូប ត្រូវបានយកទៅ​ដាក់តាំងពិព័រណ៍​មិនអចិន្ត្រៃយ៍​ នៅក្នុងសារមន្ទីរ Meet You Museum ក្រុងប៉េកាំង ប្រទេសចិន ចាប់ពីថ្ងៃទី១ ខែឧសភា ដល់ថ្ងៃទី៣០ ខែសីហា ឆ្នាំ២០២៦។

ពិធីសម្ពោធពិព័រណ៍មិនអចិន្រ្តៃយ៍នៅប្រទេសចិន ប្រធានបទ៖ Meet Angkor Wat: Treasures from the National Museum of Cambodia ធ្វើឡើង​ក្រោម​វត្ត​មាន​លោក​ជំទាវ​បណ្ឌិត​សភាចារ្យ ​ភឿង សកុណា រដ្ឋមន្ត្រីក្រ​សួង​វប្បធម៌​និង​វិចិត្រ​សិល្បៈ ​និងជាប្រធាន​គណៈ​កម្មាធិការ​អន្តរ​ក្រសួង ​ដើម្បី​សម្រប​សម្រួល វាយតម្លៃ និង​ត្រួត​ពិនិត្យ​វត្ថុ​បុរាណ​ខ្មែរ​ដែល​ត្រូវ​យកទៅ​តាំង​ពិព័រណ៍​នៅ​បរទេស។

សូមរម្លឹកថា កន្លងមកពិព័រណ៍នេះ ធ្លាប់បានដាក់តាំងនៅសារមន្ទីរ South China Sea Museum ខេត្ត​ហៃណាន​អស់រយៈពេលបីខែ ហើយមានភ្ញៀវចូលទស្សនារហូតដល់ ៥១៣,០០០នាក់។ តួ​លេខ​ភ្ញៀវ​នេះ បានបង្ហាញថា ប្រជាជនចិនចាប់អារម្មណ៍ខ្លាំងពីវប្បធម៌ និងប្រវត្តិសាស្ត្រខ្មែរ។ ព្រឹត្តិការណ៍នេះ ឆ្លុះបញ្ចាំង​ពី​ភាព​ជោគ​ជ័យ​នៃ​ការ​ផ្សព្វ​ផ្សាយ​វប្បធម៌​ខ្មែរ​តាម​រយៈ​យន្ត​ការ​នៃ​ការ​ផ្តល់​កម្ចី​រូប​ចម្លាក់ទៅដាក់តាំងបង្ហាញនៅបរទេស។ សកម្មភាពនេះ ជាផ្នែកមួយនៃការផ្សព្វផ្សាយ និង​ស្រូប​ទាញ​ទេសចរចិនមកទស្សនាប្រទេសកម្ពុជានាពេលអនាគត។

ការតាំងពិព័ណ៍នេះ ជាគម្រោងពិព័រណ៍ចល័ត​ដែល​នឹង​ត្រូវ​ធ្វើ​ឡើង​នៅ​តាម​ទីតាំង​សារ​មន្ទីរ​មួយ​ចំនួន​នៅ​ក្នុងប្រ​ទេសចិន។ ពិព័រណ៍នេះ ធ្វើឡើងតាមរយៈកិច្ច​សហប្រតិបត្តិការ​រវាង​នាយកដា្ឋន​សារ​មន្ទីរ​ Art Exhibitions China​ និងសារមន្ទីរ Meet You Museum ដោយមានការ​គាំទ្រ​ពី​ក្រសួង​វប្បធម៌ និងវិចិត្រ សិល្បៈ នៃព្រះរាជាណាចក្រកម្ពុជា៕