កម្ពុជាត្រៀមដាក់ឱ្យអនុវត្តពន្ធប្រាក់ចំណូលលើរូបវន្តបុគ្គល និងការអនុវត្តពន្ធលើចំណេញមូលធន នៃមូលដ្ឋានចំណូលថ្មី ដើម្បីរក្សា កំណើនចំណូលចរន្ត បន្ទាប់គម្រោងសម្ព័ន្ធមេត្រីភាពស្ថាប័ន រវាងអគ្គនាយកដ្ឋានពន្ធដារ និងសហភាពអឺរ៉ុប ត្រូវបានដាក់ឱ្យអនុវត្តជាផ្លូវ ការ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុង ពិធីប្រកាសជាផ្លូវការ គម្រោងសម្ព័ន្ធមេត្រីភាពស្ថាប័ន រវាងអគ្គនាយកដ្ឋានពន្ធដារ និងសហភាពអឺរ៉ុប ស្តីពីការពង្រឹងការប្រមូល ចំណូលសារព័ន្ធនៅកម្ពុជា នៅថ្ងៃទី៣០ ខែមេសា ម្សិលមិញនេះថា ផ្អែកតាមក្របខណ្ឌសាធារណៈឆ្នាំ២០២៧-២០២៩ ដែលទើបត្រូវ បានអនុម័តក្នុងកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី២៣ ខែមេសា កន្លងទៅថ្មីៗនេះ, ចំណូលចរន្តឆ្នាំ២០២៦ ត្រូវបានរំពឹងថា នឹងមានកំណើនប្រមាណ ៤,៧% ធៀបនិងចំណូលឆ្នាំ២០២៥។ ឯកឧត្តម ថ្លែងថា ទោះបីយ៉ាងនេះក្តី ចំណូលចរន្តឆ្នាំ២០២៦ អាច នឹងមានការថមថយខុសនឹងការព្យាករណ៍ខាងលើ អាស្រ័យទៅការវិវត្តនៃសមភាពការណ៍នៃសង្គ្រាមនៅមជ្ឈមបូព៌ា និងទំហំនៃការប៉ះ ទង្គិចនៃសង្គ្រាមនេះមកលើសកម្មភាពសេដ្ឋកិច្ចជាតិ។

ឯកឧត្តមអគ្គបណ្ឌិតសភាចារ្យ បន្តថា ក្នុងន័យជាជំហរគោលនយោបាយសាធារណៈ រាជរដ្ឋាភិបាលនឹងបន្តពង្រឹងការប្រឹង ប្រែងកៀគរ និងពង្រីកមូលដ្ឋានចំណូលចរន្តឱ្យបានជាអតិបរិមាថែមទៀត។ ក្នុងស្មារតីនេះ, គម្រោងសម្ព័ន្ធមេត្រីភាពស្ថាប័ន រវាង អគ្គនាយកដ្ឋានពន្ធដារ និងសហភាពអឺរ៉ុប គឺជាគម្រោងដ៏សំខាន់ក្នុងការពង្រឹងប្រមូលចំណូលសារពើពន្ធ គាំទ្រដល់ការអនុវត្តគោល នយោបាយសាធារណៈរបស់រាជរដ្ឋាភិបាល និងការត្រឹមដាក់ឱ្យអនុវត្តពន្ធប្រាក់ចំណូលលើរូបវន្តបុគ្គល និងការអនុវត្តពន្ធលើចំណេញ មូលធន នៃមូលដ្ឋានចំណូលថ្មី ដើម្បីរក្សាកំណើនចំណូលចរន្ត។

ឯកឧត្តមអគ្គបណ្ឌិតសភាចារ្យ បានបញ្ជាក់ថា ពន្ធលើរូបវន្តបុគ្គល និងការអនុវត្តពន្ធលើចំណេញមូលធននេះ គឺមិនមែនប្រភេទពន្ធថ្មី នោះទេ វាគឺជាមូលដ្ឋានពន្ធថ្មី ដែលបានចែងក្នុងច្បាប់ស្តីពីសារពើពន្ធយូរមកហើយ ហើយក៏ត្រូវបានគិតគូរអនុវត្តតាំងពីរាជរដ្ឋាភិបាល ក្នុងនីតិកាលមុនមកម្លេះ ក៏ប៉ុន្តែដោយសារភាពមិនប្រាកដប្រជានៃសភាពការណ៍តំបន់ និងសកល ព្រមទាំងបញ្ហាប្រឈមនានាដែល កើតមានឡើងជាបន្តបន្ទាប់, រាជរដ្ឋាភិបាលក៏បានសម្រេចពន្យាលើការអនុវត្តនៃការប្រមូលពន្ធទាំងពីរនេះ៕ អត្ថបទ៖ សុន រ៉ាឌី