តុលាការរបស់ប្រទេសអ៊ូហ្គង់ដា បានកាត់ទោសប្រហារជីវិតបុរសម្នាក់កាលពីថ្ងៃព្រហស្បតិ៍ ទី៣០ ខែមេសា ពីបទសម្លាប់កុមារតូចៗបួននាក់នៅសាលាមត្តេយ្យក្នុងខែនេះ ជាការវាយប្រហារមួយដែលបង្កឱ្យមានកំហឹងជាសាធារណៈ និងការព្រួយបារម្ភអំពីសុវត្ថិភាពសិស្សសាលានៅក្នុងប្រទេសអាហ្វ្រិកខាងកើតមួយនេះ។

ចៅក្រមបាននិយាយថា ការស៊ើបអង្កេតលើទូរស័ព្ទនិងកុំព្យូទ័រយួរដៃរបស់ លោក Christopher Okello Onyum បានរកឃើញតាមរយៈការស្រាវជ្រាវរួមមានឯកសារ «សាលារៀននៅជិតខ្ញុំ» និង «ការកាត់ក្បាលរបស់ក្រុមអាយស៊ីស» ជាឯកសារយោងទៅលើក្រុមរដ្ឋអ៊ីស្លាម។

នៅក្នុងការវាយប្រហារ ដែលបានកើតឡើងកាលពីថ្ងៃទី២ ខែមេសា នៅសាលាមត្តេយ្យមួយកន្លែងក្នុងរដ្ឋធានី Kampala លោក Onyum អាយុ៣៩ឆ្នាំបានចាក់សិស្សសាលាមត្តេយ្យបួននាក់ ជាកុមារតូចៗមានអាយុពីរ និងបីឆ្នាំ មុនពេលឆ្មាំម្នាក់បានបង្ក្រាបបុរសនេះ។ ឪពុកម្តាយដែលមានកំហឹង បានព្យាយាមចូលទៅសម្លាប់ជននេះ មុនពេលលោកត្រូវបានឃុំខ្លួន។

លោក Onyum បានផ្តល់ចម្លើយពីភាពគ្មានទោសចំពោះឃាតកម្មនេះ ហើយមេធាវីម្នាក់របស់លោកបានអះអាងថា លោកគួរតែត្រូវបានដោះលែង ព្រោះថាលោកមានស្ថានភាពផ្លូវចិត្តជាយូរមកហើយ ហើយធ្លាប់ត្រូវបានបញ្ជូនទៅកាន់មន្ទីរពេទ្យវិកលចរិក។