ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រថា កងទ័ពជើងទឹកសហរដ្ឋអាមេរិក កំពុងធ្វើសកម្មភាព «ដូចជាចោរសមុទ្រ» ក្នុងការអនុវត្តការបិទផ្លូវទឹករបស់ទីក្រុងវ៉ាស៊ីនតោននៅកំពង់ផែអ៊ីរ៉ង់ ក្នុងអំឡុងពេលសង្គ្រាមរបស់សហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់។ លោក Trump បានលើកឡើងបែបនេះ ខណៈពិពណ៌នាអំពីការរឹបអូសនាវាមួយគ្រឿងដោយកងកម្លាំងសហរដ្ឋអាមេរិក កាលពីប៉ុន្មានថ្ងៃមុន។

លោក Trump បាននិយាយនៅក្នុងសុន្ទរកថាកាលពីល្ងាចថ្ងៃសុក្រថា «យើងបានដណ្តើមយកនាវា យើងដណ្តើមយកបានទំនិញ យើងបានកាន់កាប់ប្រេង។ វាជាអាជីវកម្មដែលអាចរកប្រាក់ចំណេញបានច្រើន»។ «យើងដូចជាចោរសមុទ្រ ប៉ុន្តែយើងមិនកំពុងតែលេងហ្គេមនោះទេ»។ នាវាមួយចំនួនរបស់ទីក្រុងតេអេរ៉ង់ ត្រូវបានសហរដ្ឋអាមេរិករឹបអូស បន្ទាប់ពីចាកចេញពីកំពង់ផែអ៊ីរ៉ង់ រួមជាមួយនឹងនាវាដឹកទូរទំនិញដែលត្រូវបានហាមឃាត់ និងនាវាដឹកប្រេងអ៊ីរ៉ង់នៅក្នុងដែនទឹកអាស៊ី។

អ៊ីរ៉ង់ បានរារាំងនាវាស្ទើរតែទាំងអស់ដែលឆ្លងកាត់ច្រកសមុទ្រ Hormuz ក្រៅពីនាវារបស់ខ្លួនចាប់តាំងពីការចាប់ផ្តើមសង្គ្រាម។ លោក Trump បានដាក់ការបិទផ្លូវនៅកំពង់ផែអ៊ីរ៉ង់ដាច់ដោយឡែកមួយ។

សហរដ្ឋអាមេរិក និងអ៊ីស្រាអែល បានវាយប្រហារលើអ៊ីរ៉ង់នៅថ្ងៃទី២៨ ខែកុម្ភៈ។ អ៊ីរ៉ង់ បានឆ្លើយតបវិញដោយការវាយប្រហារទៅលើអ៊ីស្រាអែល និងរដ្ឋឈូងសមុទ្រដែលជាទីតាំងមូលដ្ឋានរបស់ទ័ពអាមេរិក។ ការវាយប្រហាររបស់សហរដ្ឋអាមេរិក-អ៊ីស្រាអែល ទៅលើអ៊ីរ៉ង់ និងការវាយប្រហាររបស់អ៊ីស្រាអែលនៅប្រទេសលីបង់ បានសម្លាប់មនុស្សរាប់ពាន់នាក់ និងធ្វើឱ្យមនុស្សរាប់លាននាក់ត្រូវជម្លៀសខ្លួនចេញ។