ភ្នំពេញ៖ គ្រឿងតុបតែងលំអធ្វើកម្មវិធីសង្ក្រាន្តខេត្តកណ្តាល ត្រូវបានអាជ្ញាធរមូលដ្ឋានរៀបចំបានប្រមាណជាង ៩៥% ហើយនៅថ្ងៃទី១១ខែមេសានេះ គ្រឿងតុបតែងលំអរឆាកកម្មវិធីសង្ក្រាន្តទាំងនោះ នឹងយកទៅផ្គុំដំឡើងនៅសួនច្បារមាត់ទន្លេក្រុងតាខ្មៅ ខណៈបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចាប់ពីថ្ងៃទី១៤ ដល់ថ្ងៃទី១៦ ខែមេសានេះ។

បើតាមលោក ស៊ូ ផល្លា ប្រធានការិយាល័យសិល្បៈភាពយន្ត និងផ្សព្វផ្សាយវប្បធម៌ នៃមន្ទីរវប្បធម៌​និងវិចិត្រខេត្តកណ្តាល បានថ្លែងប្រាប់BTV នៅថ្ងៃទី១១ ​ខែមេសានេះថា​ នៅក្នុងឆ្នាំនេះ ខេត្តកណ្តាល ​និងរៀបចំសង្ក្រាន្តអបអរសាទរពិធីបុណ្យចូលឆ្នាំថ្មី ​ប្រពៃណីជាតិខ្មែរទ្រង់ទា្រយធំ នៅក្នុងសួនច្បារមាត់ទន្លេក្រុងតាខ្មៅ ​ហើយកម្មវិធីនេះ ​នៅថ្ងៃដំបូងគឺមានរៀបចំកម្មវិធីបើក ដោយ​មានដង្ហែរក្បួរព្យុះហយាត្រា​ លេងល្បែងកម្សាន្ត សំដែងសិល្បៈ លេងល្ខោន ប្រគំដន្ត្រីរាំវង់ស្គរដី និង​មានការការតាំង​ពិព័រណ៍​ផលិតផល​ក្នុងស្រុកជាដើម។

នៅខណៈរដ្ឋបាលខេត្តកណ្តាល កំពុង​ដំណើរការ​រៀបចំ​គ្រឿង​តុបតែង​លំអរ​សោភ័ណភាព​ក្រុងតាខ្មៅនេះ ​គឺមានពលរដ្ឋមកពីទីជិតឆ្លាយ​ជាច្រើន បានទៅដើរលេងកម្សាន្ត​សួន​ក្រុងតាខ្មៅ​នាពេលរាត្រី ហើយបណ្តាពលរដ្ឋ បានថ្លែងថា សួនច្បារតាខ្មៅ នៅក្នុងអំឡុងមុនថ្ងៃបុណ្យឆ្នាំថ្មី​ជិត​ឈានចូលមកដល់នេះ នៅពេលយប់ គឺបាននិងកំពុងរៀបចំតុបតែងដាក់គ្រឿងភ្លើងលំអរ បើក​បំភ្លឺសាកល្បង​ ជាមួយនឹងការមានដាក់លក់​សំលៀកបំពាក់​ លក់ម្ហូបអាហារ ​និងមានលេងល្ខោន ធ្វើអោយក្រុងតាខ្មៅ មានភាពទាក់ទាញខ្លាំង ចង់មកទស្សនាដើរកម្សាន្ត។

ទោះយ៉ាងណា ឯកឧត្តម គង់ សោភ័ណ្ឌ អភិបាលខេត្តកណ្តាល បានអំពាវនាវអោយបណ្តា​ប្រជាពលរដ្ឋ​សូមអញ្ជើញមកចូលរួមទស្សនា ​កម្សាន្តសប្បាយ ក្នុងព្រឹត្តិការណ៍សង្ក្រាន្តខេត្តកណ្តាល នៅថ្ងៃទី១៤-១៦ ​ខែមេសា ឆ្នាំ២០២២ ​នៅសួនច្បារមាត់ទន្លេបាសាក់​ ក្រុងតាខ្មៅ ហើយគ្រប់ការ​ចូលរួម​ឯកឧត្តម ក៏បានស្នើអោយបណ្តាប្រជាពលរដ្ឋ សូមមេត្តារក្សាភាពអនាម័យខ្លួន ​ដោយត្រូវ ពាក់ម៉ាស់រក្សាគន្លាត ​និងលាងដៃអាកុលជែល ទាំ​ងអស់គ្នា ខណៈមេរោគកូវីដ មិនទាន់ផុត​រលុត​អស់​ពីប្រទេសកម្ពុជាយើង៕ អត្ថបទ ស៊ុមសុខជា