អ៊ុយក្រែន បានបើកការវាយប្រហារជាបន្តបន្ទាប់ទៅលើគោលដៅនានានៅទូទាំងប្រទេសរុស្ស៊ី កាលពីថ្ងៃអាទិត្យ ទី៣ ខែឧសភា ដោយវាយប្រហារកំពង់ផែ Primorsk នៅសមុទ្របាល់ទិក បង្កឲ្យមានអគ្គិភ័យ ព្រមទាំងវាយប្រហារទៅលើនាវាមួយចំនួន ខណៈខ្លួនបានបង្កើនការវាយប្រហារលើហេដ្ឋារចនាសម្ព័ន្ធថាមពល និងគោលដៅផ្សេងៗទៀត។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ការវាយប្រហារទាំងនេះបានបណ្តាលឱ្យខូចខាតធ្ងន់ធ្ងរដល់កំពង់ផែស្ថានីយប្រេង។ លោកZelenskyy បានសរសេរនៅលើបណ្តាញតេឡេក្រាមថា អ៊ុយក្រែនក៏បានវាយប្រហារនាវាដឹកប្រេងមួយគ្រឿង នាវាបំពាក់មីស៊ីលរបស់រុស្ស៊ីមួយគ្រឿង និងទូកល្បាតមួយគ្រឿងនៅក្នុងសមុទ្របាល់ទិកផងដែរ ហើយលទ្ធផលនីមួយៗ បានរឹតត្បិតបន្ថែមទៀតនូវសក្តានុពលសង្គ្រាមរបស់រុស្ស៊ី»។

លោក Alexander Drozdenko អភិបាលតំបន់ភាគពាយ័ព្យ ជាទីតាំងកំពង់ផែនោះ បាននិយាយថា យានដ្រូនជាង៦០គ្រឿងត្រូវបានបាញ់ទម្លាក់កាលពីពេលយប់។ លោកបាននិយាយថា អគ្គិភ័យនៅ កំពង់ផែPrimorsk ដែលជាច្រកនាំចេញប្រេងដ៏សំខាន់ ត្រូវបានពន្លត់យ៉ាងឆាប់រហ័ស ហើយពុំមានការកំពប់ប្រេងនោះទេបន្ទាប់ពីការវាយប្រហារ។ ក្នុងចំណោមរបាយការណ៍ជាច្រើនអំពីការវាយប្រហារផ្សេងៗទៀតនៅក្នុងប្រទេសរុស្ស៊ី អភិបាលតំបន់ Belgorod ដែលមានព្រំប្រទល់ជាប់នឹងប្រទេសអ៊ុយក្រែន លោក Vyacheslav Gladkov បាននិយាយថា យានដ្រូនបានធ្លាក់ទៅលើរថយន្តមួយគ្រឿងបណ្តាលឲ្យមនុស្ស២នាក់ស្លាប់។ កំពង់ផែ Primorsk ដែលជាច្រកនាំចេញចូលធំបំផុតមួយរបស់ប្រទេសរុស្ស៊ី មានសមត្ថភាពដោះស្រាយការផ្គត់ផ្គង់ប្រេងចំនួន១លានបារ៉ែលក្នុងមួយថ្ងៃ។ វាត្រូវបានវាយប្រហារច្រើនដងក្នុងរយៈពេលប៉ុន្មានខែថ្មីៗនេះ ខណៈការចរចាដែលត្រូវបានសម្របសម្រួលដោយសហរដ្ឋអាមេរិកដើម្បីបញ្ចប់សង្គ្រាមនៅអ៊ុយក្រែន បានជាប់គាំង។